好耐冇見嘅王菲，同李亞鵬結婚後深居簡出，留喺屋企專心相夫教女，佢早已睇化追逐名利嘅娛樂圈，生活簡單嘅佢不知幾開心，唔使喺幕前演出，又係兩個寶貝囡囡嘅媽咪，仲保養得好好㖭。
早前王菲同老友趙薇一齊出席形象設計師李東田嘅生日派對，席間除咗有王菲同趙薇外，仲有內地羽毛球手林丹，佢哋三個鬼咁老友，齊齊影咗張大合照。
魅力依然
王菲同趙薇一向私交甚篤，喺北京經常有來往，不過王菲基本上已經退出江湖，不問世事，所以絕迹娛樂圈，佢𠵱家出席私人活動都費事化妝，連梳頭都慳番。雖然王菲淡掃蛾眉示人，但係佢一樣咁sharp，連喺佢身邊、比佢年輕7歲嘅趙薇都被比下去。據知，王菲嘅受歡迎程度不減當年，佢去到邊度都必定吸引唔少fans，不過𠵱家冇嘢可以令王菲再出山，因為大女靖童同細女李嫣已經令佢夠忙啦！
