林海峰（Jan）前晚在紅館為其一連四場的「林海峰是但噏求其大合唱」揭開序幕，全場反應熱烈。Jan大講踩界又出位的棟篤笑，主打城中熱話疑似藝人淫照事件，用鍾欣桐（阿嬌）的「好儍好天真」剖白借題發揮，還勁改《男人KTV》歌詞，其中一句「張開一雙腿，太粗心大意」，令觀眾笑不停。
完騷時Jan說：「多謝大家咁支持我，𠵱家我宣佈唔會退出香港娛樂圈。」擺明揶揄公開道歉後聲稱退出的陳冠希。他事後接受訪問時說：「我只係用唔同角度講件事，用talkshow同大家分享吓，我冇資格用石頭掟人。」
玩射尿
林海峰：07年我冇乜做過，淨係小咗一次便，小便似一份工，唔急唔去做，小便可以專注去做，都可以心散東張西望，長命工夫長命做，長氣小便小腸氣。我小便俾雜誌影咗一次相，同期雜誌另一本封面係「陳太（陳方安生）去馬」，兩本雜誌拼埋係我向陳太射尿，背後一定係民建聯策劃。唔知有幾多人收藏呢輯相，藏有係冇罪，藏有發放先有罪，如果大家認識好耐啲朋友，一齊睇覺得好正，畀個copy你，黃sir話咁係冇犯法，明眼人一睇就知唔係移花接木，唔係木，係樹枝仔，我承認源頭係我，到今日睇啲相，小巫見大巫唔入流。
玩房事
林海峰：男人mood到會經過你身邊，揩揩你，帶你入房冚被，用腳撩你隻腳，咁你明啦，女人會話你兀起條尾，我知你想點，當時男人真係兀起條尾。平心而論，同女朋友做呢啲嘢，點講得出口，唔通話今晚扑嘢咩，咁樣好粗俗，不如講用膳完畢，跟住行房，都好難講出口，所以男人口講一套，心諗一套。
玩月事
林海峰：唔知點解有高潔絲（女性衞生用品）贊助我，我又唔會用，唔知佢係咪太太嘅fans，今日入場女性分子多想嚟（指月事），有啲嚟咗，有啲係嚟同唔嚟之間，鍾意我啲人係咪嚟晒，有冇邊個未嚟？因為我個騷是但噏（指女性使用衞生巾）。
玩淫相
林海峰：今年新年去拜年，一家大細圍埋睇相睇到嘩嘩聲，興奮過睇賀年煙花，最關心疑似藝人健唔健康，如果賭錢輸咗會賴啲相，估唔到一部粉紅色電腦，連人腦都壞埋，千年蟲遲咗8年嚟，個個變晒千年淫蟲。有人是但影啲相，求其放落電腦，壞咗攞去畀人整，有人是但噏，偷相嘅又求其放上網，阿Sir知道是但噏，然後求其拉咗人，搞到啲網民。
玩天真
林海峰：每逢女人報仇，都會叫男人拎手袋企喺女廁門口等，點會及女人偉大，鍾意男人乜都肯為佢做，女人真係好天真好儍。
玩奇拿
勁改陳冠希主唱歌曲《香港地》歌詞，林海峰：「對於嗰一啲相，可能有人覺得反感，唔同嘅睇法，有人繼續人傳人……以前新年送盒糖，今年啲相係咁放，問你點睇，係咪要怪晒個互聯網……新photo唔再登，奇拿仲係未拉到，拉錯咗，出返嚟，叫班網民點樣做……」