呢兩日氣溫突然轉冷，又收到上市公司要員去世嘅通告，喺地產界多年但低調嘅永發置業（287）伍氏家族，噚日宣佈佢哋嘅非執行董事及審核委員會成員伍大強，亦即伍氏家族嘅第二代，喺26號逝世。
根據永發年報資料，伍大強係公司主席伍時華嘅公子，啱啱過咗50歲，早喺85年已經加入家族生意幫手，佢主要負責資金管理嘅工作。佢仲有個細佬，叫伍大偉，遲佢兩年入公司，家吓係執行董事，主要負責行政同財務管理。佢兩兄弟一個管行政及財務，一個管資金，大家分工幫老爸，伍時華已70多歲，但仍掌管永發嘅主席一職，今次白頭人送黑頭人，華華希望佢節哀順變。
73年上市至今
伍氏家族雖然係上市公司，但向來低調，永發置業係伍時華喺71年同另一名董事蘇秋靈一齊打天下時成立，兩年後即係73年就上市，歷史悠久。做嘅主要係香港證券業務同埋物業發展，喺香港有唔少物業，主要都係投資用，亦有從事物業發展，近年就有深水埗青山道201至203號商住項目，提供18個約776呎住宅單位，地下同1樓係商業用途，另外，喺屯門同元朗都有啲地皮。