睇報紙知道青文書局老闆羅志華因有病在身，新年期間在工業大廈貨倉清理一箱箱書籍時，書架書箱塌下，將佢活埋，直至屍體發臭，先至驚動管理員報警，發現其事。佢啲老友在報紙寫文悼念，據講羅老闆因不堪租金高昂，書籍滯銷之壓力，生前生活艱苦，身後蕭條。嗚呼，一生愛書之人，為書而捱生活，為書而送命，遭書活埋。讀書人之遺恨，莫過於此。
青文書局一路都有出版書籍，老闆過身後，書籍版權不知如何處理，但係即使因資料不全而無法有效分配版權，相信冇人會埋怨羅先生，只恨上天無情而已。作者因版權而埋怨者，會係博益出版社之作者，大好公司突然停業，而且銷毀所有賣唔完嘅書籍，版權概不出售或送回給作者，實在違反任何經濟理性。商業公司不依照商業原則行事，莫非與政治理由有關？這年頭，香港實在有好多怪事出現。
講到版權，陳冠希聲稱網上流傳之不少照片，大部份係佢自己拍攝嘅，擁有版權，即係話有啲唔係佢拍攝嘅啦，一位律師對左丁山講，陳冠希若要控告報刊侵犯版權，須親自作證邊一幅係佢本人嘅傑作，提出證據來（例如拍攝時間、地點、女方證人及其他證人），中間過程會相當「過癮」。假如有報刊冒險一試，或陳冠希及海關抗辯嘅話，報刊豈有不大大篇幅報道之理？怪不得專欄作家L在飯局時講起：「香港報刊應該送張獎狀畀陳先生，獎狀上書『銷路救星』，以表謝忱！」
銷路係多咗嘅，但報刊報道陳冠希「疑似××」照片、是否可以增加利潤，頗成疑問，譬如週刊附送特輯，特輯印足十萬八萬本，成本不小，但特輯內並無廣告，即係冇額外收入，賣得越多，印刷成本越大，根本得不償失，唯一益處只係拉高平均銷量一啲啲，好向廣告商交代。一啲人批評週刊發「淫照財」恐怕係一廂情願嘅誤會。不過話得說回來，報刊編輯唔使腦汁就有十幾日嘅頭版故事，事實上係好爽嘅，單憑呢樣，編輯大佬應該慰勞吓陳先生！