華華早一日同時富金融（8122）啲高層傾偈，提到時富喺內地嘅業務，一班高層差唔多個幾禮拜就要飛一轉上海總部，咁咪個個變晒上海通？點知佢好謙虛咁耍晒手話，董事長（即係關百豪）先係上海通，仲爆關百豪過年前喺上海幾乎因為雪災返唔到香港，呢個經驗令佢體會到內地民工過年前因為雪災返唔到家鄉，滯留火車站嘅感受。
嘆港人要求多
華華搵關百豪問吓，佢話年初時有去上海，但唔係為公事，而係開政協會議，因為佢身兼上海市政協委員，（所以去上海嘅次數又比其他高層多），返港時因為雪災災情惡化，飛機都要停飛，惟有滯留喺上海，雖然都等咗日半先上到機，但比起內地民工喺火車站等幾日已經好好彩。
雖然天氣唔好，但關百豪好淡定咁話喺飛機上都唔係好擔心，做得Businesstraveller，有乜未見過喎。不過，呢次滯留經驗令佢有唔少體會，關百豪話，香港人成日有好多要求，內地人嘅要求就好簡單，淨係想返屋企過年。言下之意，似係叫香港人好好珍惜已有嘅嘢。
另外，關百豪入主時富金融，到今年已經踏入第十年，時富COO鄭文彬話，3月尾會搞過十周年派對，等啲客戶同合作夥伴齊齊慶祝。
同時，3月尾亦會推出個幾有趣嘅新服務，就係VisualBroker，好似SecondLife咁，有個虛擬場景同「卜架」提供網上服務，聽講個「卜架」仲搵咗個藝人「扮演」，但鄭文彬要賣關子，唔講住喎。