股壇長毛再次出擊，繼舊年成功打沉中海油（883）注資姊妹財務公司之後，前晚又喺自己網頁大爆中海油同緬甸毒梟合作！阿Webb點解會知？全因一位「醒目嘅讀者」（alertreader）叫佢睇吓美國財政部一份聲明。
指與緬甸毒梟合作
話說美國財政部宣佈，要制裁緬甸毒梟羅興漢（LoHsingHan）父子同佢新抱CeciliaNg，當中包括佢新抱間GoldenAaronPtd.Ltd.，原因係佢哋支援緬甸軍政府。咁又關中海油咩事呢？長毛特登摷番中海油04年份年報，發現GoldenAaron係中海油喺緬甸開發石油同天然氣嘅聯營公司，04年中海油主席傅成玉仲同過呢間公司嘅代表簽訂一個合資項目。
長毛仲好寸咁多謝美國財政部呢份資料，等大家知道GoldenAaron係邊個。今次阿Webb又一次大發雄威，記得多謝嗰位「醒目嘅讀者」呀！