繼集團主席李察出錢出力幫天水圍班𡃁仔後，8號仔電盈董事總經理艾維朗都唔執輸，即刻整番壇電盈卓越服務獎勵計劃（PCCWServiceExcellenceAward），畀旗下萬幾個員工玩吓，除咗提升員工士氣，仲可以畀佢哋發揮創意。
消息人士話，個計劃冇定死一個框框，任由同事諗計點樣宣揚客戶服務精神，又或者諗吓有乜好計sell畀啲管理層。
大獎得主有10萬銀
獎品唔錯㗎，除咗每月選出優秀員工10件（每人有1000蚊獎金），仲有年度優秀員工20強，佢哋可以得到由公司精心安排嘅免費雙人日本遊，而年度優秀員工大獎得主有10萬蚊cash，第二、三同埋優異獎就分別會有5萬、3萬同2萬銀獎金！
咁點先可以喺全公司嘅人中突圍呢？華華大膽畀啲建議──「如何令盈大地產小股東滿意私有化作價」，又或者「如何令潛在買家舒服地接受賣方叫價，以令交易順利完成」，再唔係就「如何可以無條件得到阿爺祝福」……well，呢啲都屬於客戶服務嘅一種，至少贏到個東瀛雙人遊！
講開8號仔嘅創意，佢哋個「eye多媒體」，噚日開始引入新嘅「分唇」──八達通交易紀錄、六合彩服務、播粵曲等，多功能到咁，都算有創意啩？
電郵：mailto:[email protected]