誰是新的廣播處長？大家熱烈討論，鄭大班來電，話廣播處長一職，只求人才，以十五年傳媒管理工作經驗最為要緊，學歷與年齡不拘，不論小學中學大學畢業生，無分三十五歲、四十五歲以至六十五歲，都有資格申請，但不是傳媒中人就會唔掂呢。鄭大班叫左丁山申請，或者有機會，一個唔覺意，香港電台就會由一位左處長管理！
嘩，呢個電話嚇到左丁山為之口窒窒，乜咁睇起呀，老友萬事德雖然冇乜學歷，唔知讀完中學未，但佢白手興家，管理龐大行銷隊伍二十幾年，不如叫佢申請啦。但萬事德又話周融最啱，因為周融嘅傳媒經驗豐富到極，可講乜都做過，有人反對周融上位，直情係歧視非大學畢業生。萬事德話：「香港大學畢業生有幾多呀，人數一定少過中小學畢業生，曾特首夠未讀過大學本科啦，啲港大畢業嘅AO咪一樣跟住佢！你哋唔好歧視周生呀！」
邊度有人夠膽歧視周老闆吖，之不過政府擺佢上枱，畀人一個印象係內定、指定、度身設計咁嘅款啫，如果政府喺舊年十月招聘廣播處長之時冇話一定需要大學學位嘅話，周老闆一早申請啦，點解要到今日政府先至轉口呢？𠵱家周街講，入港台做低級PA一定需要大學畢業，做最高級嘅處長就中小學畢業都無拘，你話點算好？
左丁山叫大記者申請，橫掂佢失業賦閒在家啫，佢大學畢業，以前做過兩大電視台、電台、報紙嘅記者，夠經驗噃。大記者話：「我冇資格，我想請朱培慶東山復出，遞份申請表。」左丁山話：「佢退休冇耐啫，使唔使過冷河呀！」大記者好醒目，即刻話：「如果要過冷河先至得嘅，有兩個好人選，前處長張敏儀退休好幾年，佢一定夠晒資格；另外，前副處長吳錫輝已退休成兩三年，又係合資格人選。」咦，係噃，政府嘅廣播處長遴選委員會有劉吳蕙蘭、黃灝玄、何宣威與吳元奎（列席）四人，相信佢哋唔夠膽話張敏儀唔夠資格做廣播處長啩，橫掂只係做兩年半啫，張大姐唔制嘅話，吳錫輝請捱義氣。