地產股扭轉連日跌勢，成為噚日升市動力之一，荃灣阿Joe認為新鴻基地產（016）調整已經完成，所以打嚟推介。連跌四日嘅新地噚日反彈4.1%，收報135.7蚊。
碩：黃敏碩 錦：李錦 玲：楊慧玲
Joe：新地今日升得唔錯，佢喺130蚊打咗底，我𠵱家入，睇150蚊，你哋覺得點？
錦：睇香港經濟同賣樓情況，新地嚟緊盈利都會創新高，藍籌中我認為佢係首選。
碩：新地反彈，唔排除投資者趁財政預算公佈前炒番轉，又或者借地產股推高期指。如果睇新地有進一步上升空間，首先睇番佢資產淨值，繼而再睇埋樓盤銷售、樓價、財富效應等能否進一步演化，炒減息已經唔係新鮮。前瞻啲可以再睇有冇新土儲注入、邊際利潤上升空間等。
Joe：新地下周四公佈嘅業績應該唔錯，如果進取啲買窩輪，可唔可以短炒博一博？
錦：ICC（環球貿易廣場）係新地嘅金蛋，三幾年後對佢幫助好大。近期有啲新資金流入新地窩輪，如果要買新地窩輪，要留意年期起碼要有7、8個月，有效槓桿有5倍左右算係唔錯。
渣打集團（2888）
無懼SIV影響
李先生：想推介渣打集團（2888），睇好佢業績同未來新興市場發展嘅收益。
玲：你唔擔心佢業務受SIV（結構投資工具）影響咩？
李：咁又唔係好擔心，SIV應該係一次性，對佢哋長遠嚟講應該唔會有影響。
錦：𠵱家交投收窄咗咁多，似係見底訊號，大市喺二萬三企得穩，渣打短期有機會試番50天線嘅263蚊。
碩：渣打受次按風暴拖累唔及滙豐，加上新加坡淡馬錫幾次增持，都顯示國際投資者對佢有信心。
--旺角李先生個案--
買入價：235.4元 目標價：290元
止蝕價：210元 時期：半年
滙豐控股（005）
趁業績前走番轉
李小姐：滙豐控股（005）成交增加咗，想趁佢公佈業績前走番轉。
玲：滙控上番近120蚊個位，補番一月中下跌裂口。
錦：上星期滙控窩輪佔佢嘅成交大約7至8%，但持倉過夜就唔多，反映投資者仍持保留態度。
李：如果趁𠵱家吸納正股，制唔制得過？
碩：你建議嘅買入價同目標價，只有5蚊水位，你不如等滙控下周一出咗業績先入貨。市場關注滙控撥備，股息會唔會減都係不明朗因素。
--屯門李小姐建議--
建議買入價：120元 目標價：125元
止蝕價：118元 時期：一星期
天業節水（840）
睇好環保概念
David：近期大陸成日講環保節能，今日想講吓隻相關股份天業節水（840），佢轉板之後已經由高位回落，加上話有基金接連增持，係咪可以睇好？
玲：佢之前似莊家股多啲，成日大起大落。𠵱家雖然有環保概念，但係近排唔少環保股都炒上去，佢都冇受惠。
碩：佢盈利唔穩定，要睇一段時間，其實你仲有其他更好嘅選擇。
錦：我同意炒呢類股要從成熟度同值博率考慮，就算有基金入股，資金幾多同背後原因外人未必清楚。
David：咁3.49蚊目標價會唔會太高？
碩：會，咁嘅市況有水位就獲利先，呢隻股宜短不宜長。
錦：如果真係去到3.49蚊我就唔會走，到嗰時隨時爆到你唔信。
--西環David個案--
買入價：2.55元 目標價：3.49元
止蝕價：2.3元 時期：半年
