正月十五元宵，印刷Ｌ請吃晚飯，席設Dynasty。好彩問清楚啫，皇朝會（DynastyClub）與萬麗海景西座三字樓嘅Dynasty（滿福樓）相距甚近，好易摸錯隔籬，正如話去「海都」，一定要問清楚去「中信海都」還是「新鴻基海都」，由皇朝會行番去滿福樓，相當容易；由「新鴻基海都」行過去「中信海都」，不如畀十五蚊坐的士好過。如果係港鐵公司請客，咁就唔使問，因為港鐵見傳媒，次次都係去「中信海都」嘅，絕少例外。
真係講少句都唔得，馬主Ｎ兩仔爺到咗上菜時間仍未見人，走咗去邊呢？電話響起，馬主Ｎ來電：「喂，我哋𠵱家喺DynastyClub，話冇印刷Ｌ訂位喎！」唉，唯有叫佢哋即刻趕過嚟滿福樓。
印刷Ｌ與滿福樓一位經理好熟，大家一齊參加渣打馬拉松，跑得好過癮。印刷Ｌ參加十哩賽，嗰位經理就跑全程。印刷Ｌ拿出圖片為證，咦，穿上運動長跑裝，走在東區走廊上，印刷Ｌ果然英姿勃勃。但係咁多人參加馬拉松，何故印刷Ｌ自己有張特寫照片？印刷Ｌ話：「你有所不知嘞，馬拉松豈止係運動咁簡單，直情係大生意，有一家公司派出大量攝影師沿途影相，可以講四萬二千人參加，就有四萬二千張相，全部上載到網站，我上網搵自己張相片key-in自己個人資料，就可以打印一張個人照片，印齊姓名，時間，地點，留作紀念。每張相片好似係畀咗一百九十八蚊。呢間公司全世界去㗎，所有大型馬拉松佢都有圖片供應。」
嘩，人哋嘅生意頭腦真係醒，小數怕長計，四萬二千人參賽，二萬人買張相片留念，咁就可以收番三百九十六萬，而且現在用數碼相機，唔使菲林錢，成本便宜好多啫。呢條橋自己點解冇諗過呢？抵自己冇發達。印刷Ｌ年近六十，仍然跑馬拉松，精神可嘉，佢位公子Ｋ哥就話賽跑太慢，鍾意賽車，經常到東南亞參加業餘賽車。賽車係昂貴玩意，好奢侈嘅嗜好嚟㗎，馬主Ｎ位公子聽到爽晒，躍躍欲試，左丁山笑馬主Ｎ：「不如唔好養馬，將啲錢投資在兒子身上，希望佢成為Hamilton。」馬主Ｎ話發夢冇咁早！