Blogpaper：為隻狗乜都肯制

狗係人最忠心的朋友，大家都知。狗係人的下一代，大家又知唔知呢？
好多人已經將狗變成自己的兒女，百般呵護、悉心打扮、勞心勞力以滿足牠的喜悅。為牠們打扮得靚靚變成自己的責任，因此而感到光榮。越希望牠們出眾，越想辦法令牠們變得獨特，買名牌寵物用品係他們唯一出路。你覺得呢？

http://appleblogpaper.blogspot.com

aboutme：
fluffy　周圍逛、周圍蕩是我的嗜好。從來不怕人生苦短，只怕成世人流流長兩腳一伸，沒任何值得回憶的畫面，一直堅守嘆盡、嚐盡、玩盡這人生三大目標。一世勞碌只為銀行的幾個數字才是大笨蛋，寧花盡一分一毫，也不願使剩半角三仙入棺材。

生日禮物主憑狗貴

由細到大，家中都總有一條狗，試過同期有兩條。每星期六日，姨媽姑姐親友大集合，亦變成狗隻非法集會，屋中頓時擠了五、六條狗。家族養狗秘方，就係「天生天養」這四個字。莫講帶狗冲凉浸Spa，就連小病就醫都可免則免，大家有飯食飯，冇飯先齊齊食罐頭。

人越來越講求享受，不知從何時起，狗仔亦蒙受主人聖寵齊齊享福作樂。最近收到一份驚喜十足的生日禮物，一個極盡豪華的LouisVuitton狗袋。禮物的真正用家係我的愛犬「福頭」，至於我，可謂主憑狗貴，一出街就感染到一陣陣虛榮目光。禮物的真正受惠者究竟是誰，我真係百思也得不到答案。唯一可以肯定的，我會為了這個袋多帶牠出街，製造出一個雙贏的局面。

一個一萬元的LV狗袋，跟一般LV手袋款分別不大，但如今愛犬每次出街猶如御駕出征，艷羨目光總令我感到飄飄然。虛榮之心一觸即發，馬上以找狗帶的藉口，到LV網頁狂摷其他狗用品。此時，荒謬離奇的女生自我麻醉大法會自動運作。唔明？每當麻醉大法系統意識到你有購物衝動而沒有決心，它會給你找來一個男人永不理解的藉口：「買條LV狗帶嘅價錢同買部新電話都係差不多啫，仲可以用耐啲㖭，買！」落到店一問，發覺狗帶斷貨，狗袋亦然，最後要留WaitingList代訂。原來為狗瘋狂、為狗追名牌的人唔止我一個，一貨難求的感覺更加強了我買的決心。女人，就係咁！

■LV狗袋的設計有一塊可拆式的厚棉尼龍，方便清洗，除此，你當一般手袋用都唔會有人知。

■LVBAXTER
大號狗頸圈$2,150/a
LVBAXTER
大號狗帶$2,400/a

八哥好比親生仔

由於家規洗腦，我一向界定清晰：狗即是狗，不能跟人相比。但如今不少朋友沒打算生兒育女，就以小狗作代替品。與狗友聚會，當狗係真人養的多的是，百般呵護的照顧，食得好、住得好實屬其次，奇怪的是眾狗都逐漸名牌上身。

例如肥仔ChowChow，一條Herm囗s狗圈連狗帶加埋要9,000大元。細問狗友Stella每月養狗使費，原來包括:冲凉$2,000、維他命$300、狗糧$700（她間中會親自落廚煮雞肉、袋鼠肉、三文魚作狗糧。）及每月買玩具$1,500，未計搞吓生日會、帶佢遊船河、睇醫生的月份，埋單每月$4,500，如此享受絕非凡「人」可比。

■Juice家住九龍站凱旋門，食飽就出露台坐下，每日望住無敵海景的嘆世界生活幸福過好多人。

早兩日到Frances屋企，慶賀狗仔Julian出世，原來Julian有隻家姐八哥犬叫Juice。Frances老公會每晚攬住Juice瞓，出街時又會擔心Juice一個悶，唱K、滿月酒都會預佢份，更打算帶佢去加拿大旅行！教Juice如教女，每件玩具爛咗會幫佢補番，希望佢記住自己曾經擁有的玩具，學識不要貪新忘舊。愛狗之人咁樣好正常：「沒有一種動物可以每日不厭其煩地、如此殷勤地歡迎你返屋企，狗對人的一世忠心，即使係人都冇辦法可以做到。」

■Juice一大堆玩具，即使咬爛咗，都會幫佢補番，等佢要記住自己曾經擁有的。佢真係明咩？

狗仔衫幾百蚊起

狗越來越有地位，網上訂購寵物用品的網站越來越多、流動寵物護理車、寵物游泳池服務等，可以話係處處商機。賣寵物用品的名牌仲有BottegaVeneta、Gucci及Burberry。今季起香港Burberry突然停售狗用品。順理成章，Gucci將會成為今年狗界的名牌大熱。狗袋、衫仔通通有，抵死程度連帽仔都有。再加上價錢最相宜，狗玩具由幾百蚊起，好多人都負擔得起。若果知道朋友係狗癡，我都揀佢送畀人啦。
儘管有另一種聲音反對名牌狗用品，大叫應以狗的舒適行先，不可只貪名牌外形。但家下出生率咁低，「做隻貓做隻狗都不造人」呢個趨勢，的確係勢不可擋喎。

■GucciMonogram
狗仔衫$1,690/b
GucciMonogram
狗仔帽$710/b

■Gucci真皮狗帶連狗圈$3,210/b

■Gucci紅綠色狗圈$1,470/b

■Gucci狗仔玩具波$760/b

查詢：
a/LouisVuitton（27366100）
銅鑼灣利園G06-08店

b/Gucci（21968088）
尖沙嘴圓方2064號舖