花旗兩大債保商嘅信貸評級危危乎，搞到呢排花旗股市氣氛好差，不過，前晚信貸評級機構確認佢哋嘅AAA評級，投資者即刻歡天喜地，道指仲高咗成200點收市。
上述消息係好嘅，不過次按同信貸嘅問題仲有排搞，就算債保商嘅評級都只係暫時唔變，千祈唔好太樂觀。
之不過港股昨日就靠花旗股市反彈番400幾點，喺期指結算前有咁好機會抽高，好友應該飲得杯落。今日財爺會公佈財政預算案，明日就係期指結算，睇嚟今日會風起雲湧。
新地C輪3493：新地（016）昨收135.70元，升4巴仙，算係一洗近日嘅頹風，睇個勢可以試142元，破位睇150元嗰頭，短炒可以諗吓隻C輪3493。隻輪昨收23.5仙，槓桿率5.8倍（有效3.3倍），正股升上150元，3493應該喺32仙樓上，正股跌穿128元止蝕。