早兩日，我車報員揸車經過灣仔告士打道，突然有部左軚嘅全新JaguarXF喺我眼前出現，我即刻跟住佢尾，睇吓部車有咩新嘢之餘，順便八吓部車咩料咁巴閉。
記者、攝影：車報員
轉波擰個掣搞掂
呢部新款XF最後去到銅鑼灣避風塘附近停低，仲見到代理朋友落車，既然咁啱撞到，就梗係即刻行過去望真啲同收吓料啦！先講部車，XF嘅外觀的確比以前嘅Jaguar車系後生好多，唔會再好似以前咁成熟，而車廂陳設仲有好多巴閉地方，原來唔只空間闊落坐得舒適，新設計嘅車廂鋪排亦好誘人，冷氣風口更會喺着車嗰陣先翻開，感覺就好似一隻豹對你眨眼咁，好威猛喔！
至於機械配搭方面，聽代理朋友講話到港嘅將會分3.0Classic、3.0SE同4.2S/C三個版本，前兩者係以有238匹馬力輸出嘅3.0V6引擎做核心，而後者就同到港嘅Demo車一樣，都係以一台4.2V8引擎作動力來源，喺Supercharged系統嘅輔助下，馬力輸出可以有416匹。但我覺得最特別都係由ZF提供嘅6前速自動波，特別在佢放棄咗傳統嘅桿式波棍，取而代之係旋鈕設計，而且仲要喺着車時會自動升起，熄車嗰陣會縮返落去，型喎！
臨走前，代理朋友仲叫我提提大家，如果有興趣睇車嘅話，就記得要先打電話落Showroom約個時間，同埋展期去到2月29日咋！
查詢：JaguarHK（25200989）
