黃曉明演出嘅劇集《神鵰俠侶》同《上海灘》喺香港播映後，佢喺香港同內地人氣上升唔少，最近連百事可樂都睇中佢，搵佢做代言人，繼陳冠希、古天樂、周杰倫同蔡依林後，𠵱家又多一位新成員加入，日前佢飛嚟香港同百事高層會面，聽講佢留港期間仲抽時間拍埋廣告。
上個禮拜黃曉明拍完廣告，就約埋百事高層Fion去半島酒店食飯，記者見佢哋一行八人喺中菜廳食飯，兩個多小時嘅飯局中談笑聲不絕。
同古仔一齊拍
噚日打電話問Fion係咪簽咗黃曉明做代言人，佢話：「詳情遲吓先會公佈。」據知新廣告片中，黃曉明同古天樂會一齊拍攝，百事將香港版同內地版古天樂放埋一個廣告度，認真有諗頭。再問Fion係咪短期內唔會安排陳冠希出席宣傳活動？佢就話唔會就佢嘅嘢回應。而黃曉明同陳冠希合演嘅電影《神槍手》，下個月七日喺香港有宣傳活動，陳冠希就唔會出席，只有黃曉明飛嚟香港獨自撐場。