最近無綫播緊套電視劇《最美麗的第七天》，劇中好多場景喺馬灣珀麗灣度拍，而華華近期聽珀麗灣嘅經紀講，試過有個客指定話，好想睇《最》劇入面阿邊個邊個住嘅單位喎，吓！個經紀有氣沒氣咁答佢話，套戲的確喺珀麗灣攞景，但單位入面拍嘅戲都係廠景，好彩最後都𠱁到個客去睇相近景觀嘅單位。
呢種電視劇宣傳伎倆，發展商都唔係第一次用，近年嘅就有旺角朗豪坊同埋赤柱富豪海灣，今次珀麗灣出現喺無綫雙生雙旦嘅重頭劇入面，如果早兩年出，珀麗灣一手貨一定賣得更加好價，但係𠵱家珀麗灣得番最後一期未知幾時先會推嘅低密度項目，雖然係遲咗啲，而且時間都唔係咁夾，不過就益咗島上嘅二手市場，近期睇樓量都多咗啲。
美聯珀麗灣分行助理區域經理陸耀光報料，話套戲播咗出街一個禮拜多啲，立即帶挈屋苑周末睇樓量多咗一成。佢哋啱啱做咗單刁，係個區外客，因為睇完套戲覺得啲景靚而入去睇樓，卒之用228萬銀，買咗個694呎內園景單位，呎價3285銀。不過，既然佢係鍾意個景，點解唔揀青馬大橋景嘅單位呢？真係難明！