噚日天氣麻麻，凍得嚟仲不時落雨，冇乜嘢做最好留番喺屋企休息。通常都會將星期日留畀屋企人嘅唐唐就認真唔話得，唔理天氣幾差，晏晝都專程去到深水埗麗閣邨，出席民建聯前主席曾鈺成議員辦事處搞嘅新春團拜，幫手點完睛又順便致埋辭，仲叫現場市民多多支持民建聯，祝民建聯風生水起兼順風順水，立法會選舉未開波就咁積極幫民建聯拉票，唔知佢出身嘅自由黨會唔會呷醋？
政制及內地事務局局長林瑞麟都有到場，佢嘅笠高帽行動仲誇張，一嚟到就叫阿曾做「鈺成」，令人毛管戙之餘更加忍唔住陰陰嘴笑。林D9大讚喺「鈺成」領導下，民建聯九西支部有咁嘅成績係非常成功，祝佢哋風調雨順，鞋油落得多過唐唐好多噃。
曾鈺成「臨別贈言」
至於盛傳會轉戰港島區嘅主人家曾鈺成，一篇致辭搞到好似臨別贈言咁，話好感激街坊十年嚟嘅支持，強調民建聯喺九西有今日都係靠班支部委員同幹事努力，希望新一屆會有更具創意嘅年輕人加入立法會。曾鈺成回應八方時梗係不露半點選舉部署風聲，只重申黨內家陣仲未有具體選舉安排囉。