小妹臨瞓前都好鍾意拎部手提電腦上床上吓網，點知噚日就收到個friend嘅email，話早幾日下晝，首爾有個女仔喺床上用三星02年出廠嘅P10型手提電腦，玩咗三個幾鐘，搞到電腦個電池熱熔咗，仲燒着張床。
PC10以前喺香港都有得賣；三星香港話，𠵱家事件仲係調查緊，暫時冇任何進一步嘅消息。韓國三星就話，嗰個用戶喺枕頭上面長時間用電腦，有可能將電腦嘅疏氣口塞住，令內部溫度上升引起。
理工大學機械工程學系工程師盧覺強話，手提電腦開咗之後，電腦入邊嘅電池會發熱，所以機身會設疏氣口散熱，如果疏氣口有嘢阻到，散唔到熱，嚿電熱得滯，會造成短路而發出高溫。盧覺強強調：「床上邊咁多枕頭雜物，塞住咗電腦嘅疏氣口，散唔到熱真係好危險㗎。」
逢周一至周四刊出