中鐵建（1186）喺今個星期五正式招股，勢成為市場焦點，相信唔少散戶吼到實，西貢徐小姐見近排基建股當炒，對呢隻新股亦感興趣，噚日打嚟問嘉賓意見。
碩：黃敏碩 楊：楊慧玲
徐小姐：中鐵建就嚟上巿，我想抽，你哋對呢隻新股點睇？佢同中鐵（390）邊隻好啲？用孖展大注認購值唔值博？
碩：喺技術方面，中鐵建比中鐵更勝一籌，中鐵建招股嘅巿盈率大約26.9倍至30倍；相反中鐵𠵱家巿盈率有成60倍，估值略高，中鐵建上巿之後兩間公司嘅估值有可能會拉近，但未必即刻追上中鐵。抽新股嚟講，中鐵建都值得試，不過小心如果上巿嗰陣巿場氣氛唔就，佢都可能跟住個巿一齊跌。
楊：我就覺得中鐵建絕對抽得過，就算借孖展去抽都無妨，因為預計好多散戶都會抽，所以就算抽得中都唔會分得多。
碩：預計「十一五」批出嘅合約會三分天下，中鐵建同中鐵都有機會攞到京哈高速公路嘅合約，技術支援亦都係中鐵建嘅核心業務之一，反觀中鐵其他業務只有地產。
楊：就算巿況唔就跌穿招股價，基建股始終受惠「十一五」計劃，你長揸一兩年一定會受惠。
中糧控股（606）
粟米價跌成本降
David：睇好近期強勢嘅中糧控股（606），最近粟米價格係咁跌，生產乙醇嘅成本應該可以降低，所以想現價買。
碩：內地食品需求上升，雖然發改委壓制食品價格，但對佢哋冇乜影響，中線我睇好呢隻股。
楊：佢哋喺廣西嘅新廠房就嚟投產，對股價應該有支持。
David：短炒3個月去唔去到6.5蚊？
碩：佢食品業務主要係入口，所以人民幣升值對佢有利，可以對冲通脹。加上巿盈率唔算高，股價有條件上番去6.5蚊。
《西環David建議》
建議買入價：5.67元
目標價：6.5元
止蝕價：5.2元
時期：三個月
I.T（999）
睇好會變內需股
李先生：想講吓I.T（999），佢話大陸業務頭8個月已有盈利，香港巿場利潤又好，而且佢喺中國巿場啱啱收購咗間聯營公司，又精簡台灣業務。我睇好佢會變成另一隻內需股。
碩：佢最近股價已經扭轉弱勢，同旭日企業（393）嘅合營由合資變成全資，又公佈會同老佛爺合作發展內地巿場，I.T仲要佔成六、七成股權！雖然起步慢，但近幾年內地巿場都開始接受佢哋，𠵱家係入巿好時機。
楊：之前因為要開拓內地業務，所以支出較多，但係𠵱家已經步入收成期。
《旺角李先生個案》
買入價：2.3元
目標價：3元
止蝕價：2元
時期：半年
港鐵公司（066）
博業績前升一轉
葉先生：32蚊買咗一注港鐵公司（066），喺28.5蚊又買多注，如果目標價睇31、32蚊有冇機會呢？佢3月11號會公佈業績，但係近排走勢就比較弱。
碩：佢唔算弱喇！恒生地產分類指數跌穿250天線，佢再跌穿24至25蚊機會唔大，現價28.2蚊都喺100同250天線樓上，可以再揸吓。
葉：公佈業績後會唔會升番上去？
楊：可以長揸，通常佢業績前一星期都會有啲波幅。
《深井葉先生個案》
買入價：28.5/32元
目標價：32元
止蝕價：-
時期：-
中國聯通（762）
博跌得多彈得多
李小姐：今日傳出內地電訊業重組推遲，中國聯通（762）勁跌，我想趁亂炒短線，博佢跌得多升得多。
碩：短炒可以，但要佢跌定先，要睇多一兩日睇吓守唔守到17蚊。如果你係博上番19蚊左右可以考慮。
李：我自己睇18.5蚊，應該點投資？喺17蚊樓下分兩注買好唔好？
碩：可以考慮，但係小心傳聞嘅重組同事實會唔會差好遠，傳聞佢嘅GSM會同網通（906）聯婚，CDMA就會賣畀中電信（728），拆骨之後可能會推高股價，但小心一旦政府政策有變，佢嘅估值都會變。中資電訊股嚟講，重組一日未落實，一日都有得炒。
《屯門李小姐建議》
建議買入價：17元
目標價：18.5元
止蝕價：-
時期：一個月