煲呔下個月初就會動身北上，參加人大、政協兩會，其間會見胡主席同溫總，以及即將全面掌管香港事務嘅中央政治局常委習近平。拜見阿爺固然重要，但同廣東省呢位「好兄弟」打好關係，都唔可以忽視。據聞兩會期間，新上場嘅中共中央政治局委員、廣東省委書記汪洋會特別邀約煲呔見面，傾吓兩地可以喺邊方面再多多合作。
上場即大罵思想守舊
其實，廣東省同香港嘅關係真係好微妙，就好似啲豪門兄弟咁，一方面要擺出兄弟同心其利斷金嘅感情，一方面又存在競爭同角力。八方就聽聞，近日特區政府接到廣東省一批又一批嘅官員話要專程前來香港「考察」，探索吓香港最新進展，搞到特區政府相關部門好唔得閒。
早前汪洋一上場，就喺幹部會議上大罵班廣東省官員思想守舊，並且下達最高指令，要全省幹部解放思想。汪書記上月會見到訪嘅煲呔時，都贈過煲呔呢句金科玉律㗎。據廣東省一啲幹部嘅理解，汪洋要佢哋解放思想，就係要佢哋向外學習，廣東省其中一個學習對象，就係香港。
粵官非親身來港不可
其實考察風氣一直喺廣東省好流行，澳門過去幾年多個新賭場紛紛落成，就吸引到唔少廣東省幹部親自過「馬交」考察，估唔到呢股考察風突然轉吹香港啫。據聞呢批考察人員搞到港府各個部門都好頭痕，事關就算未至於應接不暇，都覺得佢哋想知嘅嘢，其實用e-mail回覆都可以解決，根本毋須勞師動眾。
不過，有啲廣東省官員覺得非要親身嚟到香港攞第一手資料不可，八方聽聞有特區政府嘅官員接到拜訪要求後，都膽粗粗回覆話：「有乜想知，電郵嚟問就得啦，唔使親身走來走去咁辛苦。」點知對方仍然「盛意拳拳」，更加弊嘅係班廣東省官員考察完之後，仲有一大堆跟進問題傳落嚟問香港嘅相關部門，搞到好認真咁，港府唔「高度重視」都唔得。
班廣東省幹部趁齊齊動身落嚟香港「考察」，做番場好戲畀汪洋睇。但八方認為，學乜都好，特區警方處理淫照案嘅𤓓嘢就唔使學喇。
mailto:[email protected]