孫柏文返咗前宗主國出席佢妹妹嘅婚禮，臨急臨忙，又搵世民做替工。
上Wiser睇吓，原來舊年差唔多時候，世民又做孫柏文替工，咁啱財政預算，寫咗篇《推搪》，批死當時嘅掌櫃阿唐冇膽為政府嘅「長遠可持續發展」作出承擔，只會識得一味將納稅人嘅血汗錢共產，收起嚟畀佢哋班自己友大花筒。結果呢？爆咗旅發局阿莎前言不對後語、應科院公帑睇風水等等等等……
派唔派錢進退兩難
今年，桃花依舊，人面全非。阿唐拍拍籮友走人，升官半級做CS，叠埋心水排隊等2012黃袍加身做其中央欽定特區行政長官。接手做特區掌櫃嘅鬍鬚曾，份人雖然木木獨獨，唔識好似阿唐搞爛Gag；不過，佢天生一副PokerFace，嗰班攤大手板等派糖嘅公帑寄生蟲，冇晒佢符，咁嘅冷面掌櫃，啱晒當前局勢。
友人Rapiere分析，今次政府派錢又死，唔派錢又死。派錢，做壞個頭，人家日後會話︰「當日經濟好，政府都派錢啦！家陣死人冧樓次按爆破恒指插水，政府反而閂水喉？反智囉！黐線囉！」
唔派錢，啲大手掌人士又會話︰「咁多錢放喺庫房，仲唔快啲攞一千幾百億出嚟紓解民困，唔通等政府冇錢先派咩！」
很天真很儍的期望
正路分析，鬍鬚曾嘅然派唔派錢都死，所謂今日唔知聽日事，斷估佢會派派派派派派派，實行人人有金執。第日政府冇錢，就學赤松加稅，反正羊毛出在羊身上，今天robPetertopayPaul，明天又可以再一次robPeter再payPaul，到時話唔定掌櫃已經換人，𠵱家又為乜擔心咁多呢？
不過，當年的鬍鬚曾工商局局長，為多哈回合出心出力，對自由市場咁有Heart，世民很天真很儍地覺得，佢話唔定心底裏都好希望為特區長遠做多一件好事。譬如，鬍鬚曾借派派派嘅大日子，宣佈︰「政府服務，貴精，不貴多，所以今年起始，我哋將會由上至下，帶頭提高管治效率，完善一國兩制嘅偉大構想。未來五年，政府規模增長將完全凍結，任何新增服務，將由現行負責過時服務的人員提供，並為政府內部運作徹底檢討，可以為市民慳時間精力，則慳；不必要的文書，減；可電子化的，即做；可以靠市場的，政府搞不通的，統統由消費者話事。」
星期三，如果鬍鬚曾真係有勇氣講出以上一番話，我相信就算2012普選特首，佢都有得贏，仲要贏成條街㖭！