中環在線:中鐵建執澤楷二攤 - 李華華

中環在線:中鐵建執澤楷二攤 - 李華華

萬眾期待嘅中國鐵建噚日推介,華華八到佢哋嘅上市編號係1186,呢個冧巴前身係盈科數碼動力,即係李二少澤楷曾經用過,你話係咪好有來頭呢!大家應該記得盈動當年蛇吞象,食咗香港電訊,即係咁,香港電訊用開嘅係8號仔幸運冧巴,畀你係二少都識揀啦。不過,用咗幸運冧巴係咪代表一世行運?唔使華華多講,但1186就係咁落得無所依靠。
後來,謝清海出咗隻上市嘅閉端式「中國綠籌基金」,謝生唔嫌1186係二手貨,攞嚟用,直至呢隻綠籌基金轉為開放式互惠基金,07年3月26號唔再喺交易所掛牌,1186再次頓失所依。

恒大四條「3」救散戶

據聞,中鐵建將會喺下個月13號掛牌,雖然係星期四而唔係黑色星期五,但睇得出中鐵建董事長李國瑞係一個相當開通嘅人。
講開特別嘅上市冧巴,今年首隻招股嘅內房股恒大地產,之前喺各大報章賣行廣告,據港交所(388)嘅資料,佢嘅上市編號係3333,你估「生生生生」,可唔可以救番一眾買咗內房股坐緊艇嘅散戶呢呵!

電郵:mailto:[email protected]