港股雖仍係上落市，但昨日受內地A股急挫影響，高開低收，表現已有轉弱之勢，除非短期能重上10日、20日同250日線之上（3條線都在23600至23800水平，同昨日恒指收市23269只相差500多點），否則形勢不容樂觀，下試22000至21700低位支持，幾乎已係定局。
大市雖預期會再試低位，但並非會大跌，基本上恐慌性及惡性拋售在上月22日急挫之日已完成，當日大跌2061點，成交1557億元，之後成交便一路減縮，昨日更縮到只有636億元，大市目前只係在「打底」期間，上一次的低位21709即使唔係底，真正的底相去亦不會太遠。
上升正股有350多隻，大部份都只係升兩三個位，光大國際（257）收3.72元，升2仙，成交只400多萬股，上周三以大陽燭突破三角形上阻力後，形成後抽整固，再破位而上，量度升幅目標係4.20元，亦即去年11月開始的長期降軌水平。
蓄勢上破長期降軌
光國現時股價已重上所有平均線之上，10日線（3.50元）已重上20日線（3.44元），若股價再有強勢表現，則本周內10日線亦可升越50日線（3.64元），確認開展新上升浪。光國係大強勢股，股價未嘗接近250日線（在3元水平），中長線可看好，有力升破長期降軌及去年11月高位4.50元，再創新高。
去年底，揀選08年投資對象，光國係其一，當時股價3.74元，恒指在27370水平，昨天恒指23269，下跌咗4100點，而光國股價仍能穩守在3.70元之上，強勢可見，以其作為08年投資對象，賺五成，成功機會應好大。
今年盈利料可大增
中國國策大力支持環保項目，而光國亦已發展成為內地環保行業的龍頭公司，旗下的項目有19個，全部位於山東及江蘇省，累計投資近50億元，集團計劃以蘇州為中心，在長三角地區拓展，亦會在北京所在的環渤海灣，以及珠三角物色發展機會。
07年上半年，光國獲利1.68億元，估計全年3.5億元，08年會大升到7億元，每股盈利0.24元，以新能源股平均25倍PE計，股價可見6.10元，有64%上升空間。