內地地產巨頭萬科，早輪一手掀起樓盤減價戰，條戰線一下子向各省各市伸延，仲用埋啲擾敵戰術，例如專為萬客會會員而設嘅折扣優惠咁。最新一輪嘅變相減價攻勢就投放喺武漢，內地《楚天都市報》報道，即日起，武漢四個萬科樓盤貨尾嘅年輕上車客，都可以享用萬科特設嘅「青年置業資助金」，同埋「結婚禮券」，計起嚟等於打咗個93折，比起早輪喺上海嘅95折賣樓仲要低。
今次萬科預算攞1000萬人仔出嚟做資助金，強調只係一種「營銷策略」而唔係降價促銷，至於牽涉嘅樓盤包括萬科西半島、萬科朗苑呀咁，變相減咗價之後，一個90米（約969方呎）嘅單位，售價由43萬人仔起，報道話兩日內賣咗200幾個單位。
萬科自從舊年12月起，已經喺廣州、深圳、成都、上海各地大玩貨尾盤「暗」降價銷售。有內地專家話，連萬科都「扛不住」，仲有邊間地產商頂得住唔減價先？