恒指呢排喺條250日線穿穿插插，冇乜方向，不過，上個禮拜尾就有啲新發展，淡友開始發功，港股形勢差咗啲，可能同期指呢個禮拜結算有關。
大市走勢雖然差咗，但係大家都知結算前港股走勢都係睇外圍，好似上個禮拜五花旗股市收市前大幅反彈高收，期指好友今朝早點都會搶攻一段，跟住點走稍後先算，炒短線就要先諗定買乜股。
𠵱家好多藍籌股嘅走勢好差，就算有反彈，一日半日就冇氣，H股走勢都好參差，穩陣又值博嘅股票其實唔多，中鐵（390）呢排算硬淨，中鐵建招股，可以炒轉中鐵C輪。
中鐵C輪1649：中鐵上周五收9.54元，出現「破腳穿頭」升破10日同20日線，短期上試10元，破位睇11.5元，買啲C輪1649短炒，上周五收28仙，有效槓桿2.5倍，正股升上11.5元，1649可見43仙，正股跌穿8.8元止蝕。