「自己鍾意，冇辦法！」一擲1,680萬只為一句「我鍾意」，豪情壯語只有真正富豪先講得出。前日以天價投得「18」車牌嘅隱形富豪張程光，原來唔係一般廠佬。佢係港交所首十大股東之一，手執280萬股港交所股票，巿值四億。佢又曾經幫新鴻基地產創辦人郭得勝打工，做過小小嘅officeboy，之後出嚟開電子廠新興盛端子製品有限公司，成為東亞四大電子公司之一，同日本新力、住友同南韓LG齊名。
為咗奪得心頭好，張程光喺拍賣前一日專程由東莞趕返香港，凌晨返到屋企，晨早7點起身準備競投。佢原本預計500萬可以投到呢個牌，點知埋單要1,650萬，不過當時已諗住貴過1,800萬就放棄，因為1,800萬好意頭又合理。至於個牌，將會用嚟掛喺佢架寶馬度。