呢排最熱炒嘅港聞離唔開陳冠希淫照、郭炳湘豪門巨變，講到國際新聞就梗係科索沃獨立啦！老友季霆剛（自助遊專家）同小妹傾開，原來佢都好留意科索沃單嘢。自從南斯拉夫瓦解變成克羅地亞、斯洛文尼亞、塞爾維亞、波斯尼亞、黑山、馬其頓六個國家（未計科索沃），前年佢就去咗呢六國，體驗各地經濟同文化差異。
佢話，持BNO護照去呢幾處地方、入埋科索沃都唔需要簽證，都幾方便。最好選擇英國出發，搭廉價航空直飛波斯尼亞，都係400蚊港紙，之後搭火車、巴士穿梭各國，兩個禮拜行程唔計機票，約一萬蚊，食個lunch平均兩、三蚊歐元（約港幣$20、30），「但係克羅地亞、斯洛文尼亞嘅物價媲美西歐，貴過塞爾維亞成兩、三倍。」
不過，國與國之間嘅道路基建好差，路好爛。都唔知係咪啲政府唔想唔同族種人民往還，「貝爾格萊德同科索沃簡直係兩個世界，科索沃獨立都可以理解。」佢話，塞國唔多港人去，但其實好值得去，不過𠵱家嘅形勢就唔主張去住，可以睇吓佢將所見所聞寫成嘅新書《走出幽黯國度─向薩拉熱窩出發》，售價$49。哈，又幾識賣廣告喎。
逢周一至周四刊出