新正頭華華食咗唔少春茗，離唔開鮑參翅肚，不過上星期五食星展香港嗰餐，就有驚喜同讚嘆，唔係因為食到極品佳餚，而係覺得好溫暖，事關星展嘅公關好有心思，將原本喺菜單中設計嘅魚翅一項剔除，慳番嗰7000幾銀，就以每間出席春茗嘅傳媒機構名義，捐畀專門服務殘障孤兒嘅慈善團體「開心樹」，星展高層仲將每張捐獻收據，入喺利是封度派番畀記者。唔食魚翅符合環境保育，又可行善，星展呢招一舉兩得。
開心樹04年喺柬埔寨金邊，整咗第一間愛滋孤兒善終院舍，近年又將服務伸展至中國雲南。星展香港行政總裁葉約德話，開心樹嘅服務對象同星展嘅慈善公益理念相近，所以今次揀咗佢哋。
佢又話，今年適逢星展集團四十周年，佢哋會完成四十項企業關懷計劃，包括環保、教育、扶貧等，星展嘅員工亦參加唔少志願服務，好似早前有一隊人去咗印度，為啲學童翻新校舍，又去內地協助偏遠地區植樹保育。