噚日有讀者寄張相畀華華，係喺油麻地街頭影嘅一張「街招」，大大隻字話抗議順德碧桂園，夜晚九點半後就冇穿梭巴士行，直斥呢個五星級的家「騙人」。
夜晚九點半就冇車出入的確幾難搞，華華搵碧桂園（2007）問吓，發言人講，有住戶建議取消九點半後嘅巴士班次，因九點半後冇乜人搭車，但巴士又嘈又搞到空氣差。
碧桂園於是喺舊年九月諮詢住戶，見絕大部份人都冇反對，就將順德碧桂園夜晚九點半後嘅巴士班次取消，不過只係喺非主幹路嘅中南區實施，春節前一個禮拜正式出通告，家陣該段路嘅巴士實際行到夜晚十點，主幹路嘅巴士線就照舊行到半夜十二點。
其實碧桂園唔只一次俾人投訴，例如指五星級的家提供嘅唔係五星級穿梭巴士，而係一粒星都冇嘅客貨車，要去中轉站轉駁旅遊巴等。睇嚟碧桂園主席楊國強要諗諗計，俾人通街唱好易搞壞形象，如果搞到小股東有意見，咁就麻煩啦。