晶門科技（2878）舊年攞咗個由生產力促進局頒發嘅香港工商業獎（生產力及品質大獎），表揚公司生產晶片嘅質量，華華早排見到董事總經理梁廣偉，佢好開心咁攞張威水相畀華華睇，相中佢由煲呔曾手上接過獎項。
咁喺科技界打滾咗30幾年嘅Humphrey（梁之洋名，意思係和平的支持者）又覺得煲呔曾領導下嘅特區政府，可以做啲乜支援科技研發呢？佢提議畀稅務優惠、加強科研教育……講講吓就話，曾特首好似關心金融多啲噃──Humphrey一講完就發覺唔多對路，即刻補番句：「佢（曾特首）唔講，但佢會做嘅」。咁究竟特首做咗啲乜嘢支持科研呢？佢又講唔出。
Humphrey最近走去理大修讀商業行政管理博士課程，仲打算以晶門內部管理作為寫論文嘅題材，佢笑笑口同華華講，班同事唔驚佢冇時間返工，反而最怕佢讀咗一大套理論返嚟，要喺公司度試驗喎！