西甲榜首皇馬周日戲劇性0:1不敵基達菲，領先優勢已銳減至兩分（同日次席巴塞5:1大勝利雲特）。咁啱賽前會長卡達朗首次高調批評教練蘇斯達鬧球證，為輸波搵藉口；𠵱家皇馬又輸寃枉波，睇嚟蘇斯達喺皇馬嘅前途都幾危！
卡達朗：佢冇風範
周日負基達菲，已經係皇馬近期3連敗，64分鐘失嗰球波更反映球員精神唔集中。當時洛賓接應魯爾傳中射入被判越位在先，不過好多皇馬球員唔知道，只係掛住慶祝，結果被對方球員發動反擊，並由烏捷射入奠勝球。蘇斯達賽後破天荒唔批評球證，唔通同之前卡達朗嘅訓話有關？
記得卡達朗賽前講蘇斯達怨球證、運氣差、球員傷，唔係大球會教練應有嘅風範。雖然蘇斯達出名天不怕地不怕，但周日賽後就只透過球員把口嚟話球證，古廸講：「當時咁多人圍住慶祝，球證應該吹停場波啦！」
周日賽後好多傳媒譏笑皇馬球員係「白癡」，教練蘇斯達就決定企球員呢邊，「呢種情況好罕見，不過我哋應該向前看；我唔想聽到任何辱罵己隊球員嘅聲音。」輸咁嘅波都仲要撐球員，我求大俠諗除咗前車路士領隊摩連奴外，都好難搵到第2個啦！不過球員撐你又如何？呢個世界永遠係老細足球，只要卡達朗唔妥你，蘇斯達季尾真係隨時有下馬可能。
4大聯賽榜首齊失
講開又講，上輪聯賽可算係4大聯賽榜首球隊嘅蒙難日，除西甲嘅皇馬輸波外，意甲嘅國際米蘭亦被森多利亞迫和1:1，英超阿仙奴2:2同伯明翰各得1分外；德甲超班馬拜仁亦只係1:1打和漢堡，巴西中堅盧斯奧無端端後場引球出擊被偷甩，導致球隊失波，白癡指數同皇馬班球員有得比。