空姐公仔嘅制服誘惑似乎已成為華航撒手鐧，由最初嘅華航空姐制服限量版公仔，到最近嘅代言人林志玲公仔，一條橋翻炒再翻炒，偏偏中港台乘客都受落。《中新網》報道話，兩款林志玲公仔一出，就幫華航賺咗約374萬港銀外快，呢個數對一間航空公司嚟講濕碎啲，但起碼有一定嘅宣傳性同話題性。
林志玲公仔高約20公分，一個着華航空姐制服，一個着晚禮服，每款限量3000個，叫得限量，自然矜貴啲，制服志玲公仔賣900港銀，晚禮服志玲公仔賣977港銀，以唔換得衫、手腳冇得郁、樣貌像真度同「露出度」偏低嘅女性figure嚟講，呢個價錢似乎唔多值。不過，如果係志玲或者名人玩偶嘅fans，真係想買嘅話，可以喺華航網站上訂購，但攞貨就要買多張機票喺華航機上收貨，成本同風險都幾高。