花旗股市上個禮拜五戲劇性高收，昨日亞洲股市普遍造好，㗎仔股市大升414點收市，不過A股同港股就失禮啲，倒跌收市，上海A股指數更大跌4巴仙收場。大家都知𠵱家啲大隻H股對恒指嘅影響力好大，A股拖住H股下跌，恒指梗係冇運行。
後日就係期指結算，好淡雙方都會睇準機會出擊，花旗同國內股市都要昅實，暫時嚟睇，好友頂住隻滙控（005），淡友就壓住啲地產股同「六行三保」，下個禮拜滙控宣佈業績，到時可能掉轉嚟造，大家要留意。
中電C輪2042：中電（002）昨收62.95元，逆市上升4巴仙，成交好大，睇嚟仲有得上，禮拜四公佈業績前後，股價有機升破64.5元推向67元，炒轉短嘅可以諗吓隻C輪2042，昨收97仙，槓桿率6.4倍（有效4.5倍），正股升上67元，2042應該有三成升幅，正股跌穿60.5元止蝕。