內地投行老大哥中金，近年可謂受盡內憂外患困擾，對外有本土證券行同外資爭生意，公司入面就要承受股東壓力同人才流失，中金首席執行長朱雲來（前國務院總理朱鎔基個仔），睇怕都十分頭疼。噚日，彭博仲出咗單新聞，話朱總正逐漸失去對中金嘅控制，講得白一啲就係，如果佢仲係冇乜表現，就冇得留低嘅意思。
賺錢唔夠中信證券
點解連朱總都冇面畀？話說近年內地股市急速發展，造就咗一批內地證券行冒起，好似喺A股上市嘅中信證券，舊年純利就升咗成四倍，去到115億元人仔，做得有聲有色。噚日喺香港做H股推介嘅中鐵建（1186），亦係搵咗中信證券做保薦人。反觀中金就相形失色，舊年只係賺咗十幾億人仔。
除咗本地薑，中金仲要面對唔少過江龍嘅競爭，好多華爾街大行好似瑞信、高盛等都想加入呢個市場，令競爭進一步加劇，有傳話好多唔滿意朱總「一言堂」做法嘅中金職員，已經被撬走，令朱總內外受壓。
股東查懋聲出聲勸喻
屋漏更兼逢夜雨，一直不滿喺中金冇話事權嘅摩根士丹利，見到其他外資行喺內地搞得有聲有色，有意出售中金股份，實行自己拓展內地業務。
唔知係咪咁嘅原因，搞到一向低調嘅中金股東、名力集團主席查懋聲都出聲同彭博講，中金係時候作出改變：「朱總同管理層應該坐低諗吓，中金未來5年嘅發展路向。」
朱雲來自從03年出任中金總裁以嚟，睇怕都未試過呢次「四面楚歌」嘅滋味。據講，阿爺連中金嘅董事長都想轉埋（現任董事長係汪建熙），人選係國務院發展研究中心副主任李劍閣，想借助佢增強中金嘅實力咁話。
電郵：mailto:[email protected]