「Jay，一張醉臉儍癡癡，Jay，不喜說話像冬天……」80年代長大的港人，誰沒聽過這首當年播到街知巷聞的《午夜情》？那位歌者，叫劉美君，香港流行樂壇第一代少男殺手。
80年代中期，22歲已結婚生仔的劉美君，以叛逆媽咪形象殺入樂壇，潮得令人嘩嘩聲，兼且一炮而紅，締造神話。時光飛逝，21世紀神話延續──43歲，三個孩子的母親，以為她變成黃面婆、肥師奶？竟然皺紋無添加，身形結實，4月紅館開騷復出，她定過抬油。
獨樂樂不如眾樂樂，劉美君公開她的防腐秘方：麥皮洗面、日日冲凉過冷河、自溝香薰護膚。不節食、不買護膚品、不入美容院，還跟愛美女星唱反調，「越做facial越大鑊！」但信不信由你。 撰文：朱倬誼
-健美篇：勤做運動DIY護膚-
當大家都說謝安琪以一個歌手身份，去公開結婚生仔的家庭生活有多開通和多新奇的時候，相比劉美君的故事，謝安琪簡直是小兒科。
劉美君是童星出身，18歲嫁給導演黃泰來，20歲生仔，22歲推出首張唱片竟勁賣30萬張，成績拍得住當時的賣碟天王譚詠麟。80年代人妻歌手一碟走紅，怎不算是神話？
堅持以麥皮洗面
近年港人流行集體回憶，43歲的劉美君以三子女媽咪身份借勢復出，從美國回流返港，但歲月待她真好，她面上沒有半絲皺紋，腹部扁平，手瓜起𦟌，肌肉紮實，難怪她說得自豪：「我到𠵱家都係一個神話呀！TVB嘅梳頭師傅華姐，成日都話你有冇生過㗎？我啲鬼佬朋友都會話你係咪㗎？三個仔女嘅媽咪？但開心㗎。」
中年人總要面對衰老及發福危機，劉美君守得住陣腳，原來有獨門方程式，但先旨聲明效果因人而異，劉美君說：「我冲完凉、洗完面，我係會過冷河，冲一陣凍水。我唔去美容院，唔做facial，唔會花幾千蚊買護膚品，我用麥皮洗面，用自己溝嘅香薰油搽面護膚，由90年代用到𠵱家。我從來唔會用出面買嘅嘢，有人請過我好多次做護膚品生意，但我做過咁多次生意，次次都有少少……算啦，過去嘅嘢唔再提，等我搵到個可靠嘅partner時，我一定會出呢個天然護膚嘅product。」
做facial最大鑊
大多數的女人都為「靚」和「瘦」兩個字畢生奮鬥，投資金額、時間無限，女星們最buy的名牌護膚品、去美容院接受貴得咋舌的護膚療程，劉美君一概唔吼。
她說：「我發覺做facial嘅人，塊面係最大鑊，我由細到大樣樣都唔聽媽咪講，好彩有樣嘢聽媽咪講，『唔好成日化妝做facial呀，做開唔得㗎，會死㗎，越做塊面越壞呀！』好應驗喎，我真係聽媽咪話唔化妝。好多女人做開facial，唔做facial同唔纖體唔得一樣，我覺得如果你有呢嚿錢，你可以一生人不停做facial，我就繼續用麥皮洗面，喂，唔係淨係我㗎，梁家輝老婆同我一樣，唔搽面、唔用護理嘢，同我一樣皮膚咁好，唔搞個人就越好，佢肥係另外一件事，係佢食嘢唔均衡啫。」
講到食，劉美君更加開懷，在她的字典中，沒有節食這個詞語，要瘦要有線條，只信兩件事：均衡營養、做運動。她說：「我嗰日聽到陳慧嫻話食蛋白同菜減肥，你想我死都似，我係冇可能食蛋白同菜可以過活！食吓煲仔飯、海南雞飯、整多一、兩份靚蛋治就差唔多，我一定要食正常嘢、正餐，但我係有個蹺妙嘅，我每日必定會食一大盒沙律菜，我覺得係平衡，每日都要菜同蛋白質，每朝食嘅早餐有豆奶、麥皮、雞蛋、香蕉，我都係呢啲，菜就係必食嘅。」
健身跑步不可缺
劉美君續說：「我會跑步，跑30分鐘，一個禮拜三次，我係咁多年嚟都keep住健身，運動一定要做，人冇肌肉就撐唔起層皮。其實我18歲時已經做健身，我發覺自己手腳太幼，好營養不良，我覺得好肉酸，淨係得個頭，做健身希望係有啲線條、有啲肉，但逐漸變成一種自戀，個個人審美眼光唔同，我覺得要有少少肌肉先至靚。我喺戒煙後水腫嗰排最慘，突然肥咗，嗰時120幾磅，係脂肪同水，所以要做運動，冇肌肉只得鬆弛嘅皮、支撐唔到個人，雖然𠵱家體重同當年都係5磅度，但脂肪加水、同肌肉比就好唔同啦。
「我個人好阿Q，呢幾年做咗瑜伽之後學到嘅哲理更加阿Q。我睇呢個世界，諗嘅係正面嘢。咁多年嚟，我都有跌落谷底嘅時候，會傷到好透、痛到好深，過程好痛苦，有試過自己睇唔開，但過咗之後都冇事，但冇咁多上落就冇咁精采。乜事？都過去咗，唔記得晒啦！我練瑜伽係letgo所有嘢，要皮膚靚，就最緊要唔好諗咁多煩惱嘢啦。」
-復出篇：覺得自己唱得好好聽-
劉美君今次從美國返港，立心玩一鋪，簽了經理人及唱片公司，4月則舉行紅館演唱會，她為的不是攞獎湊熱鬧，是為心癮、滿足表演慾，她說：「04年我本來返香港開演唱會，但因為細路仔唔舒服，cancel咗，到05年我返嚟做Now個演唱會，啲人反應好犀利，又一大堆人叫我返嚟，最後我都係返美國，要靜一靜心，因為太浮，覺得返嚟俾人捧到天上有地下無，感覺唔真實，練吓瑜伽、靜低個人會冇咁慌亂，練咗一年後，就好清楚自己想要啲乜嘢。」
唔識鄧麗欣
劉美君續說：「當時我開始聽番自己啲歌，覺得自己唱得好好聽，照住塊鏡擺甫士，嗰啲癢癢地表演慾開始返嚟，咁啱Toppy（其經理人）搵我合作，我係一個好自我嘅人，如果唔能夠依我意思去做，咁不如唔好做，但佢乜都OK嘅，今次我係好有興趣，係從未試過有𠵱家呢顆心，係天時地利人和，返嚟係為高興，我只顧今天不顧將來。」
長駐美國的劉美君對香港樂壇生疏到極，甚至不知誰是人氣偶像鄧麗欣（Stephy），她說：「我唔識佢喎，我由出道開始都係做緊同樂壇唔一樣嘅嘢，係喺樂壇以外耷低頭做緊自己嘢嘅人，我返嚟後都冇留意樂壇，但自己唱片公司嘅人就梗係識啦，張敬軒我咪識囉，返嚟香港咪淨係識《酷愛》囉。」鄧麗欣被網友嘲笑成「鄧走音」，劉美君倒是嘩一聲說：「唔好咁話人啦，咁陰功！」
欣賞陳奕迅
令劉美君最有印象的後輩歌手是陳奕迅（Eason），她笑說：「陳奕迅見過三次，佢同我一樣都係得得地，大家有樣好似，就係唔怕醜，所以我鍾意佢，大家好爽直又冇乜遮掩。」出奇的是，劉美君竟然認識冷門組合壞碑唇，也知道他們曾現場演繹她的名曲《亞熱帶少年》，女主音歌聲單薄兼走音，跟劉美君的嘹亮歌聲是天和地，劉美君笑道：「個女主音有sende-mail畀我，話唱過我嘅歌，我有聽番，但我唔會有評價，因為我唔會講大話，寧願保持緘默。」
-愛情篇：老外禮儀當街激咀-
劉美君有兩段婚姻，她和導演前夫黃泰來誕下一子一女，長子23歲，次女18歲；02年她再婚，與現任丈夫育有一名4歲女兒。不過劉美君和前夫再見亦是朋友，早前她拍攝新歌MV，黃泰來還親自為她找來幕後班底，將她拍得靚靚。
與前夫關係密切
劉美君返港重披歌衫，她說小女兒交給婆婆照顧，但有關現任丈夫，她三緘其口，反而樂意提及前夫，她說：「黃泰來都讚我keep得好，話我冇老過㗎。我喺美國經常同個仔出街，個仔嘅同學都唔信我係佢媽咪，當我同啲仔女係四兄弟姊妹、婆婆係阿媽㖭，𠵱家我日日都同啲仔女喺網上webcam見嘅。」
潮媽玩webcam與時並進，更勁的是她8年前已和𠝹女王尹子維在蘭桂坊當街激咀。重提舊事，她閒閒說：「自己啲朋友都係鬼婆鬼佬，呢啲社交禮儀冇問題，𠵱家我都係咁，冇人影到之嘛，我同女仔都會kiss，冇乜特別啫，又唔係周街三點盡露。」
攝影：陳志嵐 協力：黎敏茵
場地：馬哥勃羅香港酒店
服裝：CK（黑、白背心/黑色V領上衣）/HystricGlamour（黑色T恤及灰色披肩）/A/X（閃藍長褲）
髮型：GarySun@Headquarters
