夾着「美少女廚神」及「味之天使」之名勇闖樂壇的賈曉晨（JJ），前晚亮相《蘋果》網站直播節目《娛樂開CHAT》，於廣大網友面前，公然表示想嫁給金城武，並渴望將來能像「花師奶」一樣，做個精打細算的肥師奶。當主持人要求JJ在金城武、劉德華、陳冠希、譚詠麟和尊尼狄普（JohnnyDepp）當中揀出生命中重要的男人時，JJ毫不猶豫地大呼金城武「老公、老公！」並說早在看電影《如果．愛》之時，已覺得要嫁給他。此外，酷愛靚仔的JJ選擇了劉德華做散拖男友、尊尼狄普做固定情人、陳冠希做兒子，譚校長則做老竇。至於母親和女兒的人選，她的心水分別是家燕姐和蔡依林。大家可登入《蘋果》網站 http://ent.appledaily.com隨時重溫節目。
採訪：懷鈺、林惠卿 攝影：林德雄
最鍾意睇戲唱K 馬鞍山Zero
Zero：我知道你遲啲會出專輯同寫真集，除咗呢兩樣外，仲有乜嘢其他新發展，例如拍電視劇、主持遊戲節目？
JJ：暫時仲未知，不過公司幫我傾緊，可能會拍戲。
Zero：平時你都鍾意煮嘢食，最拿手煮乜？
JJ：最拿手係炒菜，不過呢排都好少下廚，因為媽咪喺度幫我煮，加上做完嘢好懶煮。
Zero：平時除咗煮嘢食，仲會有乜嘢其他活動？
JJ：我好鍾意睇戲同埋唱K。
Zero：幾時會同fans有聚會，我哋都想多啲見到你。
JJ：其實呢樣嘢我都期待咗好耐，我都希望公司可以幫我安排個特別日子同大家聚會，我遲啲同公司傾吓。
俾Eason華仔電親 東涌Demi
Demi：你入咗娛樂圈之後，可以見到好多唔同嘅男藝人，有冇邊個男藝人電到你？
JJ：好多喎！其實好多靚仔藝人都可以電到我，不過愛情，去鍾意一個人就好難。
Demi：咁你個偶像係邊個，你鍾唔鍾意台灣嘅藝人？
JJ：我好欣賞Eason、劉德華，Eason好有才華，劉德華好勤力。而台灣我好鍾意小豬，佢又靚仔，主持節目又好，我都希望可以有機會同佢合作。
想扮演女俠警察 沙田Raymond
Raymond：你成日寫blog，有冇考慮喺就嚟出嘅寫真集入面寫啲感想，或者將來出本散文？
JJ：其實有諗過喺寫真畫啲畫，因為我好鍾意亂畫，大家又覺得OK。我自己寫嘢唔係好叻，可能會畫畫。
Raymond：你講過想拍戲，有冇啲角色係未試過，但又好想做？
JJ：好多角色我都想做，例如古裝、女俠、差人，因為我真係一個新人，太多嘢未試過，希望有多啲機會可以嘗試。
感激Fans留言鼓勵 西區Bobo
Bobo：我想問JJ最想fans幫佢做啲乜，或者一齊做啲乜？
JJ：你哋每次喺我個blog留言，對我講啲鼓勵說話，我已經喺個心度笑，有你哋支持已經畀我最大幫助，所以我唔需要真係話要乜嘢，你哋一路支持我，我已經好開心，好多謝！
