薛凱琪（Fiona）前日於旺角出席慈善義賣活動，於義賣貼紙期間，被人用一支盛有飲料的膠樽擲傷右額眼角，被送院敷治及到警署錄取口供後，即返家休息寫blog，向fans和朋友報平安，昨日則起程到日本大阪工作。
薛凱琪前日到旺角朗豪坊出席慈善活動時，慘遭一男子飛膠樽擊中右額眼角，她旋即往廣華醫院敷治，小休一天後，昨日隨即到日本大阪工作。
押後拍唱片封套
昨日下午1時許，Fiona架上超大墨鏡，並將頭髮梳成「劉海」遮掩傷口，由一名女助手陪同下出現機場，對於現時傷勢，已收拾心情的Fiona說：「個頭仲好痛，後頸筋都扯到吓，件事影響我拍唱片封套要押後。」
至於會否起訴該名男子，Fiona說：「因為警方話係刑事，唔係話我告唔告，係警方要告，自己真係冇諗過呢件事發生，總之交畀警方處理，自己唔諗。其實都好慶幸，要祈禱，因為個樽掟中咗個女仔先反彈落我個頭，卸咗啲力都好痛，我諗掟中眼就應該會盲。」
Fiona指事件發生後，收到不少朋友的短訊慰問，當中包括緋聞男友房祖名，而她的父親得知事件後也嚇親。Fiona表示覺得當日的保安已足夠，今次事件只屬意外，她日後也沒必要加強保安，不過她笑言可能對水樽留下陰影。
另外，Fiona前日到警署錄口供後返家，她沒有即時休息，反而於晚上8時許在其個人網誌 http://www.fiona-sit.com.hk發表英文網誌，向fans交代事件。她在網誌中感謝前來支持她的人，雖然額角腫起，但最重要是她的人身安全沒有問題。遇襲事件令到前日的慈善活動未能圓滿結束，但希望大家多多行善，幫助有需要的人，繼續支持「麥當勞叔叔之家」慈善活動。
囑fans不要擔心
前日原來是Fiona母親的生日，Fiona在網誌中透露她遇襲一事，令原先和家人外出吃晚飯的計劃有變，只好留在家中用膳。她說和自己深愛的親人一起，便是生日的最佳禮物。最後，她再次叮囑fans不要替她擔心。
採訪、攝影：娛樂突發組、懷鈺
官恩娜：真係好難防
官恩娜昨日以一身學生造型，到順利邨拍攝港台電視劇《我是香港人》，對於薛凱琪前日遇襲受傷，年前曾被男fans衝上台強吻的官恩娜表示意外沒法預防，她說：「藝人係公眾人物，始終都要面對群眾，唔通用webcam見人咩，不過呢啲事真係好難防。」官恩娜希望薛凱琪早日康復，她說：「我都有睇到新聞，我以為係個fans見到佢太開心，想引佢注意，我覺得要好好教育吓市民。」
此外，官恩娜表示在《我》劇中扮學生有一定困難，她說：「我要做一個好窮嘅無證居民，講我要着住套校服先至有安全感。」
採訪、攝影：李珮洳
全城熱話--鄭希怡：太惡作劇
薛凱琪遇襲傷面，原來不少圈中人也曾受襲，惟有打醒精神，自求多福。
鄭希怡（圖）：觀眾自律
呢啲好難避免，觀眾應該尊重歌手，今次太惡作劇，個人心理有問題。其實都好難避，總之觀眾要自律。
周柏豪：額頭腫咗
活動之後我有同佢SMS、MSN傾嘅，佢都有覆我「哈哈，I'mfine」，佢俾人掟中時我見到前邊條燈柱震，我以為佢撞柱，喺後台見到佢額頭腫咗，好似一粒綠色嘅波子咁。Fiona入番後台，都驚到慌失失，有人叫佢都聽唔到。
張文慈：曾遇胸襲
之前我去內地做騷，有人伸手想胸襲，我即刻用手遮住個胸，點知女助手就不幸中咗招。
葉文輝：被吐口水
我做嘢見過喺樓上有人專登向我吐口水，好彩我避得到，返內地做嘢，又試過俾人掟螢光棒，掟中過幾次。佢哋真係變態㗎，我哋在明佢在暗，藝人要自己小心。
關智斌：俾人掟書
啲人真係好癲好恐怖！嗰個人要承受法律責任。我試過喺商場做騷，被人掟書落嚟，好彩冇人受傷。
