陳冠希（Edison）雖然在日前舉行的謝罪記者會上公開認錯，懇求備受疑似藝人淫照風暴波及的女星及港人原諒，但淫照事件女角張栢芝的前經理人、中國星老闆娘向華強太太陳嵐前晚出席BMA唱片公司春茗期間，卻怒轟Edison道歉太遲，才令淫照失控傳開，連累受害女星、納稅人及警方，更直言「dayone已經想打Edison」。
轟動全港的疑似藝人淫照風暴，未有因男主角陳冠希在日前舉行的記者會上公開道歉、直認是淫照拍攝者及承諾退出娛樂圈而畫上句號，由於事件牽涉女星眾多，淫照又被廣泛流傳，波及整個娛樂圈，與淫照風暴女角張栢芝合作多年的中國星老闆娘向華強太太陳嵐，向來敢言，她前晚出席BMA春茗，提及Edison時不禁越講越㷫，總之全部都是他錯。
「香港觀眾會睇佢咩」
對於Edison開記招道歉，向太前晚說：「聽出邊啲反應好好，有人可憐佢，但無補於事啦，傷得人咁深冇可能講句sorry就cover到，好難唔怪佢。佢出得嚟太遲，但都好過冇做。」Edison選擇退出娛樂圈圖息風波，向太則斥道：「有得佢話唔退出咩？香港嘅觀眾會睇佢咩？香港嘅警察保護佢都奇怪啦！香港嘅男女、一般巿民，dayone見到呢啲相已經想打佢啦，呢啲係直接嘅反應。」問向太是否想打Edison？她說：「呢個係你哋話啫！你想打佢呀！呢啲風氣唔可以容忍，教壞細路。」
責任全歸陳冠希
向太直言今次整件事都是Edison錯晒，她說：「唔好話我幫啲女仔，啲女仔點吖？嫁人嘅已經嫁咗，有啲就快結婚，有啲就話要嫁人！」雖然向太和栢芝曾一度因解約問題有爭拗，但她不排除會與栢芝再合作，惟獨Edison合作免問，她說：「一切都有可能，但冇可能同Edison合作，好多人都有可能，但佢就一定冇可能。你哋記者都係娛樂圈一分子，香港冇乜特產，係出明星，被傷害嘅唔止佢一個，就咁讀個稿saysorry就算？佢真係出得嚟太遲，令到偷相嘅可以發多啲，𠵱家全世界都有。」
向太更透露早前她身在美國，栢芝曾主動致電給她拜年，但大家未有提及淫照事件，她也不察覺栢芝有異樣。不過被問到會否覺得栢芝很儍時，向太則說：「我點會答你呀！我只可以話，阿嬌（鍾欣桐）話自己年幼無知，好多人會喺年幼無知之下做錯事，或者心態失常時做錯事，大家要原諒佢哋。佢（陳冠希）話唔畀人睇，點解啲人會知？唔知就唔會偷啦！啲男人要影，啲女人就俾人𠱁。」
警察納稅人覺煩
近日有傳栢芝聲稱抱子跳樓來要脅丈夫謝霆鋒不要睇淫照，向太說：「我唔知，你哋問番寫嗰個啦，係佢亂寫。我哋有聯絡，但未必係呢件事，我冇需要同你哋講，唔好問我邊個慘唔慘，總之講sorry冇用，被害人會唔會原諒佢呀！呢件事中港台嘅人同埋差人都好慘，佢私人嘅紀念俾人偷咗，但係納稅人都會覺得煩，因為動用咗200個警察，我哋啲阿太驚戴珠寶出街，係咪差人會保護呀！」此外，栢芝老爺謝賢和女友CoCo前晚也有出席春茗，但他堅決不就淫照事件發言。
採訪、攝影：王連連