震驚全城的淫照風暴近日因男主角陳冠希返港，舉行記者會公開道歉及宣佈退出香港娛樂圈，而掀起另一波高潮，不少圈中人均十分關注事件發展。
劉嘉玲：件事已經交代咗，應該畀大家呼吸吓啲新鮮空氣。陳冠希退出娛樂圈都好可惜！
官恩娜：我希望件事盡快完，我都唔想講太多啦。但係我睇新聞有對年輕男女又影性愛照片，而且個女仔又未成年，我覺得應該將個男仔繩之於法，佢咁做真係好唔啱，因為個女仔心智都未成熟。呢排真係好多風化案，又有老師同學生，所以捉到呢個男仔可以起到警誡作用。同埋Edison自己都講，年輕人都會以藝人作榜樣，所以藝人更加要檢點。
鄭希怡：我會打電話畀阿嬌，惟有希望佢可以快啲收拾心情，可以繼續工作，至於話觀眾唔接受佢，呢個都係唔講嘞。
徐淑敏：我有睇佢個記者會，我滿意Edison個道歉，亦都接受佢道歉，我覺得佢係有誠意同有心出嚟道歉，佢嘅講詞幾完善，有承擔後果亦都退出香港娛樂圈，佢可以做嘅嘢係咁多，我諗佢係衡量過太早出嚟未必有利啩，不過啲女仔傷害好大，希望件事告一段落，今次件事亦都令香港人更小心保護自己嘅相。
田蕊妮：呢單嘢好悶啦，關我哋乜嘢事，件事對fans、幾個當事人同佢哋屋企人已經有好大傷害，唔好再挖佢哋個傷口啦，應該有個了結，唔好再畀好或者唔好嘅評論。我老公本身就唔會要求我影呢啲相，如果佢叫嘅話我何止鬧爆佢呀，而且佢本身冇咁嘅喜好。至於有年輕男女影呢啲相，我唔敢話係唔係受Edison呢件事直接影響，可能未有呢件事發生前佢哋都會做咁嘅事去增加性趣，係咪佢本身有咁嘅習慣。
馬詩慧：𠵱家先係教育嘅開始，我教咗仔女好耐，不過個細仔都未識住，佢把口好叻，𠱁女仔一流，所以要畀心機教佢。