亨泰（197）股價跌到落去年8月大奇迹日水位，炒內需，炒受惠人民幣升值，亨泰抵搞。亨泰主打多種類嘅快流消費品、冷凍鏈產品及農產品國內分銷。
集團近5年度純利，年年穩升，07年度（6月底止）純利，更加翻半番兼創埋新高，上到1.9億銀。亨泰受惠祖國經濟同消費飛升，業績講明一切。
要咁睇，由8月大奇迹日以嚟，人民幣係咁升，照理人仔升值，大大增加進口消費品嘅購買力，加埋同胞豪得起，對亨泰業務肯定有利。亨泰股價最近四個月跌咗40%，去番8月低位，同所有有利因素背馳。再講，喺咁有利嘅條件下，亨泰08年度純利係咁意增長20%無難度，但已經可以突破2億銀大關，PE都係得7倍水位。內需股，亨泰平到爆。博亨泰翻半番到2.58元，PE都係10倍水位，一啲唔過份。
港建短炒抵博
香港建設（190）對上兩日，緊貼半年下降軌，想破未破，要昅昅。港建呢期轉型搞祖國物業同替代能源，07年半年度（6月底止），已經受惠投資物業增值，純利上到6億銀，兼且超越晒06年全年度純利5.7億銀水位，07年度業績已經唔係問題。剩低替代能源呢瓣業務，純短線已經可以炒分拆或者上市概念。
呢轉短打，博港建上番基金配股價2.05元，現價（1.77元）升幅16%，有魚有肉。