郭富城前晚在亞洲博覽館舉行尾場演唱會後，要隔四年才會再辦個唱，他自言在台上不捨得眼濕濕。其經理人小美比他更眼淺，於慶功宴上拿起咪即哭了出來，大讚城城是好歌手。城城坦言熊黛林有傳短訊給他，但沒入後台，不過他歡迎所有緋聞中的女人探訪他。
郭富城在亞洲博覽館舉行的七場「郭富城舞林正傳演唱會延續篇2008」前晚結束，當城城穿着以一萬粒水晶鑲造的戰士服飾時，可能過於投入跳舞，以致兩度跌耳機，幸好他及時執生，拿着耳機繼續又跳又唱，然後趁機將之放入褲袋。
籌備音樂劇
因為尾場關係，城城應觀眾歡呼大叫出場encore，他穿着浴袍出場感謝觀眾，他說：「再隔四年先有演唱會，呢四年盡快有屬於郭富城嘅音樂劇，事業上有另一突破，四年後再見。」最後眾舞蹈員出場將城城拋起才完場。
慶功宴上，城城逐一請有份出力的幕後功臣上台接受獻花，輪到小美上台，她甫拿起咪即哭了起來，然後說：「做呢個concert有好多無名英雄都病晒，成個panel位都係藥，呢半年個個同事不眠不休，我流嘅係開心嘅眼淚，好辛苦但好滿足，最緊要係有一個好好嘅歌手去演繹呢個演唱會。」
後來城城接受訪問表示，他在台上唱《臨行》時，想起隔四年才再有個唱，他也唱至眼濕濕，他說：「好彩平復到心情，一唱完歌就諗起嚟緊嘅工作，因為我已經成熟。」城城透露欲演愛情音樂劇，女主角是內地女星，他謂：「一日同小美開會，見個女仔喺電視出現，幾OK，佢拍過劇，我哋未見過面。」問他會否找模特兒演，城城說：「一定要識唱歌、演戲同跳舞，同我合作嘅，跳舞要有番咁上下，外形要合襯。」
談到緋聞女友熊黛林三度到紅館及博覽館捧場，城城謂熊黛林沒有入後台，門票也不是他贈送，城城說：「我做演唱會時好專注，今日得陳木勝入後台，之前有古巨基同桑蘭。」
「恭喜佢啦」
其後城城突然煞有介事說：「其實我冇乜嘢，邊個入嚟就嚟囉，好歡迎任何人士，包括緋聞中嘅女子。」至於熊黛林謂打算30歲結婚，城城甜笑說：「恭喜佢啦。」問他是否準備好，城城故意看着記者說：「Areyouready？」逃避回答。
採訪：李珮洳
攝影：仇志德
