從飛機窗望出去，巴塞隆拿北面的雪山似塊5A級的松阪牛肉（左圖），但我知道我5分鐘後將要降落的地方其實……瘦瘠，就shopping而言。
為甚麼西班牙？冒險應該趁行得走得，尤其當你從三張幾嘢的身體學識甚麼叫做「衰退」，有張清單就越來越清晰地浮現──「體力關大閘前最想去（而未去）的地方。」
我20歲那年已經想親手摸摸Gaudi的牆及柱及窗框及門把，空頭支票都快慶祝銀禧了，難道還要拖？出年腳骨力未必等我。
又或者我只想擴闊自己的購物版圖，去未必有，但不去一定冇，又東京又巴黎又倫敦，全部前面都要加個「又」字。
我不入地獄，誰去Barcelona？
我估我生肖屬鴿吧，對，沒有執錯字粒，是鴿不是雞，認路和讀地圖是我的內置功能，在陌生城市的甚麼地方有我要買的東西，我總是回家一樣有種本能找對巷口與門牌，不巧如果你是路盲，我的建議是「同類的店子你只要出力找到第一間」你要找韓紅，識到洪卓立就可以了，洪卓立會幫你找到薛凱琪，薛凱琪問李克勤，李克勤打畀周華健，搭過去飛輪海查到蘇永康的電話號碼……總之終於你會見到韓紅的，而且中途還大贈送了王菲、鄧穎芝和大塚愛都唔奇……
在巴塞隆拿找到Jofre是好開始，你ontherighttrack了，這間multi-brand的selectshop，單是Barcelona就有五間分店，男裝一間童裝一間鞋袋一間女裝當然有兩間，五間分店隔籬左右分佈於靜英英的高級住宅區，明顯主攻出沒於街頭街尾的某一類顧客──買很貴靚料而冇乜款「出年仲着得」的中產制服，櫥窗內衣架裏的自然是黑黑黑（下刪1,000字），正常，時裝發展中國家的必經階段，不妨一睇（反正巴塞其實冇乜時裝睇），但我冇買嘢，反正我是來問路的。
果然有料到，一問就問到Herm囗s在一個街口之外，呢，嗰間我上次同你話好多Birkin袋擺晒喺度冇人搶嗰間呢。如果你只想變成「珍」或「嘉麗絲」，不妨詐諦陪老公去睇坐足十萬人的足球場CampNou，然後竄去主攻waitinglist款式，我覺得這個trip是值得的。（當然是在我這段料揚晒之前啦）。
而且對面還有間LV，犀利到呢……門口鋪的地磚居然都是monogram的，而且鋪到連續幾個街口都是，有圖為證（圖）。
（Sorry，我後來才知這是巴塞隆拿政府指定的地磚設計，度度都有的，咁啱花有相似而已。）
另一間較適合見多識廣的香港人去的時裝店叫JeanPierreBua（是孖店來的，隔鄰還有走更edgy路線的分店JeanPierreSymbol），分別其實只不過是前者賣DriesVanNoten、Dior、JPG，後者賣吓RickOwens和MartinMargiela而已，他們的規模與買手的眼光，在香港來說勉強合格，但在這個我行了三日街連一個Balenciaga或者Herm囗s或者Prada或者Chanel袋都未見過有人拎的城市（補充：LV見過一個咁大把），呢間嘢已算係咁。Oops，我係咪洩露咗呢個城市嘅秘密。
GonzaloComella，另一間唔太好又唔太衰的時裝selectShop，由VeraWong到D2立立雜雜乜都有啲，如果你大把時間就去吓啦（不過我估你都係大把時間居多，我的三天西遊記總括來說：是腳痛但膊頭唔痠，冇機會痠。）
真正較啱我心水的multi-brandshop是呢間，SantaEulalia，堂堂開正喺龍頭區大馬路最貴租的舖位（對正CASAMILA），櫥窗卻樸素得迹近倒米，雖然舖面分了一半賣Banker律師的悶爆返工西裝，但剩下來的千零呎地方倒是善用得很，骨骨子子地擺了些Lanvin、Dior、NeilBarret，還有CommedesGarcons和Balenciaga仲想點？
我仍然嫌他們素色得滯，因為西班牙人似乎是個很勇於着紅色的民族，三日當街觀察，我發現周街男女老幼身上或多或少有點紅色點綴，我問售貨員為甚麼批貨咁素呢？他答：「係，的確係好多人着紅色，但佢哋多數都係普通市民，來這裏買衫的是有錢又有型的一班，他們都着黑！」
因為想被人以為「有錢又有型」而着黑是一件多麼老套而無型的事啊，我諗，我都係着返多啲色做吓平民安樂啲有趣啲。
講起着返彩色的，由於人人都提我去西班牙遊玩時小心財物，所以專登唔着咁靚去巴塞隆拿，為免黑黑黑予人有錢有有型的「洗劫好對象」感覺，於是決定自己嗰三日五顏六色扮平民（圖），結果……結果居然有當地時裝網站的記者捉住我影街頭snapshots，吓，我今日好烏where咋噃，咁都值得影，可見西班牙心目中的時裝和香港人眼裏的潮是相當九唔搭八的。
Sybilla改咗行唔車衫做床單，Mango唔關我事，Zara我又唔係幾得，入屋叫人入廟拜神，總要到一到國寶級的Loewe鞠個躬吧，我常覺得她們這幾年那些簡約清爽又善用線條的女裝系列是被under-rated咗的，一心行去搵啲嘢買，可惜我是男人幫襯不到她們的靚袋靚裙，惟有遠遠從window再一次欣賞她們心思，誰知，不望由自可，一看就發現她們的window有條幾呎長的玻璃裂紋，我衝口而出的三個字是「靚爆鏡」，就當是新年流流的祝願吧。
Textby黃偉文
本周GuiltyPleasure
想不到逛完兩天巴記後，最大的highlight竟然是入大百貨公司揀特價花仔睡衣，我平時怕俾人撞到唔型，喺香港係唔敢做㗎！
（待續）
