「舞王」一向好勤力𢱑銀，所以身家都唔少嘢，辛苦搵嚟自在使，佢好捨得買靚車、着靚衫，出親嚟都身光頸靚，不過佢份人就闊佬自己、孤寒人哋。
泊車界笑話
關仁聽朋友講，舞王平日揸住佢嘅超級靚車，去開銅鑼灣嘅話，大多數都會駛去某酒店交畀代客泊車，有一次佢攞車時，咁啱撞見記者，為顯示尊貴地位，佢一出手就喺銀包拎咗500蚊出嚟，畀個泊車仔做貼士，搞到泊車仔鬼咁開心，點知記者影完相離開之後，舞王竟然返轉頭，同泊車仔講話拎錯銀紙，即時收番五嚿水，換番張100蚊紙畀人哋。
其實舞王畀100蚊人都冇乜唔妥，不過佢對住記者扮闊佬，過後又問人攞番，咁做就真係有啲肉酸，所以佢呢件事已經成為泊車界嘅笑話。
Textby關仁
