喺低息環境下，好多人都諗緊借錢投資呢個話題。如果真係計劃借錢投資，首先就要諗吓邊度可以借到「平錢」。最便宜嘅貸款應該係樓按，市場做緊最低嘅實際樓宇按揭息率低到只係2.85厘，但對於一般後生仔嚟講，唔係個個有層供滿咗嘅樓拎去按，借「平錢」做投資。
投資收益冚利息開支
敏妮當然唔鼓勵後生仔借錢投資，尤其仍在求學階段嘅學生，就更加應該專注求學。不過，敏妮教財務嘅阿sir最近講咗佢一個學生嘅故事畀敏妮聽，讀財務嘅都好抗拒負債，話說佢個學生諗住借免入息審查嘅學生貸款，主要都係因為家陣貸款利息低，佢嘅如意算盤係，借錢嘅利息支出，靠投資賺番，變相做到免息借錢讀書。
敏妮上政府嘅學生資助辦事處網頁睇過，免入息審查貸款計劃嘅貸款利率，以發鈔銀行平均最優惠貸款利率減2.451釐，再加一個風險調整系數，由於最優惠貸款利率不時有變動，所以政府會不時公佈最新嘅免入息審查貸款利率，𠵱家做緊嘅係5.132厘。
做人民幣定存博升值
由於貸款係借嚟讀書，而呢個學生嘅目的只係想唔使畀息，所以投資一定要穩陣，目標回報率係高過5.132厘。市場上有好多高息外幣存款，例如紐元、英鎊、澳元等，都達到回報率高過5.132厘嘅目標，但係外幣有滙價升跌風險，暫時以澳元較為多專家睇好，而半年澳元定存利率介乎5.72至6.9厘，可以達到冚學生貸款利息嘅目標。
不過，敏妮同光頭仔傾開呢個話題，佢就話，不如做人民幣定存。雖然半年期嘅人民幣定存息率，家陣只係做到介乎0.7至0.8厘，但市場幾乎一面倒睇好人民幣升值，滙豐睇升5至10%，假設以下限水平5.7厘計，亦達到原先嘅目標。
http://wanmanli.com/blogs/