超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
今期〈歡樂天地〉絕不歡樂。縱未至係魂歸寶「殿」般哀傷，惟90年代天才球星之一列馬倫，1月簽約富咸後，滿以為夕陽無限好，豈料操練時因「疑似」心臟病送院，並已「遣返」回祖家芬蘭養身！呢壇嘢係富咸儍仔，定「飛人」黑？
已年屆37歲嘅「芬蘭飛人」列馬倫加盟富咸僅3周，仍未正式亮相綠茵，但無啦啦喺早前操練時因「疑似」心臟病發送院；經過一輪檢查，病因未明，富咸採取最保險嘅做法，送佢返祖家調理身體，穩陣為上。球會發言人證實消息：「列馬倫檢驗出心臟有毛病，並立即前往向專家求診，球會就畀佢唞唞先，但願下周佢可以重歸我哋嘅大家庭。」
深受鶴臣器重
富咸阿頭鶴臣曾領芬蘭挑戰08歐國外，對「飛人」甚為賞識，並力邀後者繼01年效力利物浦後，回歸英超賽場，成為陣內第4名芬蘭球員。「飛人」加盟之初，鶴臣直言寄予厚望：「雖然佢此刻未有實戰狀態，但質素絕不成疑問，球隊將倚重佢作為骨幹，力爭保留英超席位！」
富咸今季撞晒邪
離奇嘅係，該9屆芬蘭足球先來投時好地地，體檢亦順利通過，究竟係邊度出錯，導致其暗病冇人知？實情富咸今季都幾邪，特別多球員出事，好似中場布拿特就曾被隊友拜阿廸踢爆鼻、老將麥比廸季初就觸傷長唞等，莫非球會開「咧」唔記得拜神？
曾遨遊歐洲多國聯賽，足迹踏遍西班牙、瑞典、德國及荷蘭等地，「飛人」歷來嘅金球多不勝數，其來投原本係富咸嘅希望，可惜今次歸家都唔知幾時返嚟，就算返嚟球會都怕會事件重演，呢個希望話唔定一個屈尾十變成萬個失望！