二月十六日年初十，好日也，左丁山睇完通勝，知道巳時（九至十一時）係吉時，立即叫醒老婆，九點幾就去到車公廟，只見遊人不多。拜車公唔會太擠逼，啱晒。老婆話打電話提醒沙田陳太拜車公，但陳太未完全瞓醒，含含糊糊咁話：「下晝食完飯先至去喇。」下晝食完飯已經係三點（寅時），凶時也，不過沙田陳太唔介意，冇所謂啦，只係左丁山每在農曆年期間特別八卦而已。譬如二月十四日年初八，適逢西方情人節，通勝寫住：「初八甲申水奎破」，破日梗係諸事不宜，只宜沐浴掃舍破屋壞垣。但你唔好理，當日在香港公園，見到新人結婚，人哋唔知幾enjoy，以後嘅結婚紀念日就係情人節，你話幾浪漫呢，理鬼得佢○八年二月十四日係破日咩。
沙田陳太果然在下午四時（通勝話係凶時）先至去到車公廟，廟外之小停車場泊滿旅遊巴士，有車開走，有車開到，少說也有二十幾架，擠塞異常，警察特別封場，不准其他車輛入停車場。陳太心諗，乜咁多自由行遊客呀，車公廟真係帶旺沙田噃，但係睇真啲，自巴士落車嘅遊客多數係長輩，貌似本地人，唔似大陸遊客，再行埋旅遊車旁，哦，看清楚指示牌，標明係民建聯，沙田陳太先至明白係民建聯主辦嘅「新界一日團」或者係「車公參拜團」。沙田陳太不禁讚嘆一聲：「民建聯啲地區工作真係掂，不愧係有財有勢有人嘅政黨，民主黨就一定搞唔到咁多架旅遊巴嚟車公廟。」
唔怪得民建聯在區議會選舉中大勝，睇怕今年九月七日立法會選舉中，以民建聯平時積累嘅動員能力，好有機會成為立法會第一大黨。單以車公廟一帶而論，係劉江華地頭，到咗九月七日，隨時運載坐滿幾十架旅遊巴嘅選民到票站投票，泛民主派邊度會有如此氣勢與氣魄呀？新界東有七位立法會議員，就係劉慧卿，劉江華，李國英，鄭家富，湯家驊，田北俊，梁國雄；沙田陳太見到劉慧卿最多，聽聞劉江華最多，不知李國英是誰，未見過鄭，田，梁，湯，九月再選嘅話，沙田陳太相信劉小姐劉生幾乎實掂，其他幾位，未必可以老定連任㗎！