淫照風波席捲全城，吹走不少面具，第一個受「風災」傷害嘅，就係香港警察，一早話抓到發佈淫照源頭，點知淫照有如細水長流，源源不絕咁流入互聯網，連第一個被拘控嘅涉嫌人物鍾亦天亦被撤銷控罪，教人懷疑當初警方高層何故急於邀功？
上到茶室，財務L話自己好彩冇十歲八歲嘅兒女，否則不知如何答覆佢哋有關淫照嘅問題。佢啲兒女已長大成人，當然唔會問佢啦，如果財務L要睇靜物照片或甚至可移動圖片，佢邊識上網搜尋呀，一定要問番仔女教路。
財務L好多年來只睇西片，唔睇唐片，有朋友以為佢崇洋，自細係番書仔，睇慣西片之故。呢日財務L先至揭底牌，佢話：「我唔睇唐片，係因為一路覺得唐人演員導演冇政治良心，係拜金主義者，依附權貴，以前為咗台灣市場，爭相加入自由工會，後來為咗大陸市場，就唔再踏足台灣，全無珍方達、米亞花露、史匹堡呢類人物。呢呢，現在又加多一樣，影藝圈人素來人慾橫流，𠵱家年輕一輩更加自拍成人影帶，供諸同好，以此表示自己威風，點知資料外洩上網，又有人話自己天真，好儍，受到傷害，直情虛偽到暈，我點肯使錢買佢哋嘅唱片，睇佢哋做戲吖。」
財務L講到十分肉緊，幾乎連叉燒包都咬爛，左丁山叫佢唔好咁勞氣，當睇笑話便是。有人講互聯網侵犯私隱，侵犯肖像版權，傳媒作大，推波助瀾。唉吔，影藝圈人士要宣傳之時，就搵娛樂版記者講私人生活（當然係包裝過嘅），特登着少啲衣服，演胸露肚，故意走光少許，嗰陣講乜嘢私隱呀？要人尊重，就唔好將成年人在房間內嘅行為，攝製成照片/影帶啦，你估呢類照片係佢哋守得好緊密嘅私人秘密咩，有消息人士話部份圖片早已在佢哋圈子內互相傳閱，甚至下載落手機，洗頭時畀埋髮型師睇，以示威風，𠵱家學人講私隱，講版權，乃天大笑話。成年人拍影帶冇話唔得啫，後果自負可也。