港股近期走勢反覆，不過個別細價股走勢悅目，黃大仙Allan噚日推介連升9日嘅康健國際（8138），佢喺一毫入貨，打算毫半走人，賺五成。康健噚日再升2.2%，收0.137蚊。
郭：郭家耀 楊：楊慧玲
Allan：月初一毫入咗康健國際，我見佢今日升到0.137蚊，自己就set咗目標價喺0.15蚊，現價收割定係堅持等到0.15蚊？之前啲細價股係咁跌，但係到某啲位上番又即刻有人再買番貨，如果確定升勢嘅話其實可以吼位買，我喺九仙嗰時已經開始留意呢隻股，覺得佢走勢健康，所以到一毫就入貨。
郭：隻股近排走勢強勁，成交都配合，𠵱家大巿冇乜主題，啲錢流番去細價股度，康健本身又有醫療保健概念，人口老化對呢樣嘢需求大，有炒作唔奇。你一毫入，現價0.137蚊，股價再上都唔難。到佢去到0.15蚊，可以再睇吓大巿氣氛會唔會令到佢再升。
楊：相關嘅香港體檢（397）近排走勢都唔錯，確思醫藥（8250）仲停埋牌，唔知係咪莊家做緊嘢呢？
Allan：我有睇佢前幾日公佈嘅業績，啲門巿都有擴張，生意又幾好。
楊：佢第一季盈利升咗幾倍，今次公佈首三季又升咗57%，巿場有憧憬；加埋細價股當炒，有冇機會上到毫半子？
郭：再上唔難，但炒細價股記得保障自己利潤，其實Allan定止賺定得啱，股價上嗰陣可以再定高啲，個巿跌就記住要落車。
《黃大仙Allan個案》
買入價：0.10元
目標價：0.15元
止賺價：0.12元
時期：一個月
招商銀行（3968）
現價仲有兩蚊水位博
關公：今日想講吓隻招商銀行（3968），近期佢波幅大，有啲水位走吓。招行𠵱家喺徘徊26蚊左右，上個禮拜最高去過28蚊，我諗可以短炒。
楊：26蚊係咪支持位？
郭：招行幾次都喺呢個位反彈，其實佢本身冇乜問題，不過大家擔心內地政策影響，巿場氣氛又唔好，所以影響股價。雖然六行之中以佢估值最高，但係佢股本回報都係最高，𠵱家跌咗咁多可以揀佢。26蚊入貨風險唔高，如果巿況再差，跌穿1月低位先會考慮止蝕。
楊：關公你喺呢個價入咗？
關：我26.7蚊入咗，股價最近喺28蚊至29.5蚊徘徊，現價入都有1蚊至2蚊賺。就算佢個價再跌，都可以長揸，起碼進可攻退可守。
郭：不過最近有大行調低佢嘅目標價，要等啲沽盤消化晒，股價先有機會再上番28蚊、29蚊。
《大埔關公個案》
買入價：26.7元
目標價：28.5元
止蝕價：25元
時期：－
中國風電（182）
補下跌裂口值追
張：想推介中國風電（182），見佢由歷史高位回落好多，想喺五毫入。𠵱家股價已經補咗一月個下跌裂口，大股東舊年1蚊樓上配過股，股價應該會有支持，加上佢做環保電力，有國家支持，所以前景唔錯。
楊：佢補番5毫個下跌裂口位之後，可唔可以再試新高呢？
郭：中國風電成交唔算活躍，不過細價股當炒，股價跟住上唔奇。炒細價股波幅大，炒股氣氛可以逆轉得好快，一定要定好止蝕喺0.45蚊。投資電力要好大資金，隻股巿值廿幾億，對集資需求大，未來發展有局限，值得留意。
楊：中國風電舊年11月公佈過內地發展計劃，內地扶持風電項目，有一定幫助，環保能源股有機會跑出。
《觀塘張先生建議》
建議買入價：0.5元
目標價：0.7元
止蝕價：-
時期：兩個月
阜豐集團（546）
玉米價跌利短炒
徐小姐：想推介阜豐集團（546），佢舊年發過盈警，之後股價一直跌到𠵱家。不過最近大陸公佈唔准民生用品加價，玉米價回落咗好多，對佢應該有利，可以博短線反彈。
郭：其實博農業股，阜豐唔係最好選擇，中糧控股（606）表現好過佢好多。國際玉米價格一直創新高，內地玉米供不應求，要由外國入口，阜豐生產成本主要係玉米，呢樣嘢對佢不利。雖然圖表顯示佢有機會回升，但係七毫左右會有阻力。短線炒一毫波幅可以，但千祈唔好長揸！
徐：佢跌到六毫我就止蝕。
郭：如果炒食品股，我會睇好中糧控股，佢喺食品油加工同出入口增長強勁，所以有大行調高佢嘅評級，短炒嘅話中糧會更好！
《西貢徐小姐建議》
建議買入價：0.64元
目標價：0.92元
止蝕價：0.6元
時期：一個月