陳冠希（Edison）昨日就淫照風波在港召開記者會，承認相片是他所拍，並向受牽連的女藝人、家人以及全港巿民道歉，他決定退出香港娛樂圈，希望大家原諒他。大部份藝人都認為Edison今次舉行記者會道歉有誠意也很勇敢，值得原諒及給他機會，至於退出娛樂圈，曾志偉覺得他是自我懲罰去補償錯誤；白韻琴則覺得Edison應去看醫生，接受心理及行為治療。撰文：林妃
曾志偉：一種承擔
佢同受害女仔道歉係必要，退出係佢個人一個抉擇、一種承擔，佢知自己有錯，要負一個責任，冇理由一句道歉就過咗去，佢咁做亦係一個負責任行動，對自己一個懲罰，用自我懲罰去補償自己嘅錯誤，都算係一個交代，選擇退出都關乎自己前途，都係一個實際交代，我個人嚟講可接受。
白韻琴：佢係病態
佢有冇講啲女仔係咪自願影相？個記者會唔畀問問題，咁咪仲勁過美國總統？佢唔做娛樂圈係明智之舉，就算做都冇人有興趣睇啦！佢根本就係有展覽狂，唔畀人睇影嚟做乜？呢種係病態，明知錯都會做，佢其實需要心理、行為治療。我唔覺得受害者、或者愛害者嘅父母會原諒佢咯，佢有冇親自向啲女仔道歉呀？唔係就咁向公眾道歉就得咯！
薛家燕：覺得可惜
呢件事對佢影響好大，網民反應好大，對被影相嘅人影響都好大，佢唔退出真係唔知可以做乜嚟補償呢個殺傷性。不過我都覺得好可惜，畢竟𠵱家小生唔多，佢又唱得、又識演戲，又靚仔，係一個不可多得嘅人才，一下子疏忽影響咗佢嘅事業，呢次當係一個借鏡，佢走呢條路對大眾都有交代，因為唔知會面對攻擊幾耐！至於阿嬌，既然佢肯面對，不妨畀個機會佢，呢件事佢已經好大傷害，將來佢要結婚嫁人，點向人交代？
黎姿：要諗後果
值唔值得原諒就真係冇諗過，淨係覺得佢要出嚟交代，因為件事牽連好多受害者，好同情佢哋，希望以後冇呢啲事情發生，因為做每件事都要諗後果，個後果可能一生都改變唔到。
郭羨妮：想人死咩
我覺得佢係應該道歉，負責任，佢都退出娛樂圈，仲想點啫！想人死咩？佢應該做都做咗。
張堅庭：值得原諒
我覺得佢係值得原諒嘅，好有勇氣。退出娛樂圈係佢嘅決定，佢可以做幕後，過一段時間再返幕前，亦可以返內地發展。佢做呢件事，係佢同女仔嘅關係，啲相流出去係處理得唔好，但偷出嚟嘅人都好大責任，某程度上佢都係受害者，所有矛頭都指向佢唔係百分百公平，嗰啲同朋友分享睇完又傳畀人嘅網民，應該同陳冠希一樣，喺心入面講聲對唔住。
Freeze：浪費警力
我哋覺得佢浪費好多警力，我哋都係納稅人，咁大個人做嘢，應該嗱嗱聲返嚟搞番掂佢，𠵱家慢咗少少。我哋覺得佢要出嚟道歉，佢真係拖得件事太耐，好似好不負責任，今次開記者會算似番個男人。
