左㩒、右㩒、擺埋Pose再㩒多兩㩒。喂，搞邊科？原來係要盡情Show豪華版Mazda5嘅左右電動雙趟門！的確，呢個咁貼心嘅賣點，喺中小型MPV身上絕對罕有，上落車毋須再紥晒馬咁開閂趟門，揸住Remote瀟瀟灑灑㩒個掣就得，尤其老人家坐車或搬嘢時你就知遙控趟門嘅可貴之處，難怪揸嗰個可以咁得戚。
記者：黎頌詩
攝影：陳盛臣
Model：Karie
㩒兩㩒中門大開
Mazda5嘅人氣焦點，毋庸置疑，肯定係雙趟門設計，雖然Facelifed版嘅全新賣點一大堆，但係呢兩扇醒目趟門，都係令人忍唔住要一講再講。點解咁Buy？話明係家庭車，老人家細蚊仔當然係常客，完全打開有成700mm咁闊嘅趟門，要照顧佢哋上落就更方便。再講，即使捐隆捐罅，都無唔夠位開門嘅煩惱，攝位上落話咁易。講埋多用途，要搬大件行李？雙電趟門，貨Van咁款，又係有晒優勢，總之，實用性贏晒。豪華版仲有埋SmartKey遙控開關，㩒兩㩒，即時中門大開，隨時Ready畀你全家出動四圍去！呢架新版Mazda5嘅升級設備，令駕駛者同乘客嘅享受都大提升，一於逐樣同你睇真啲。
舒適感總提升
無可否認，Mazda近年喺實用性同外觀上都大力着墨，越做越好，而且從善如流，好似新添置嘅後置冷氣出風口，就係因應用家要求而設。新設出風口設於前排中央手枕後方，車廂溫度因而更為平均。效果唔係任你講，有晒數據支持，有後置出風口，前排同後排嘅溫差只有8℃，喺以前，兩者嘅溫差會高達10至12℃，𠵱家就算大熱天坐後排都唔怕焗到暈啦。講享受一定要提新設嘅Aux插頭，可將MP3機或iPod駁到車上音響聽歌，絕對係緊貼潮流之作。
新版內櫳唔再堅持黑沉沉玩跑味，換上全新嘅杏色，視覺上無疑更加年輕醒神，之不過如果家有愛塗鴉頑童，會幾頭痛。再者，雖然舒適度比前作有所提升，不過中小型MPV弱點依然存在，後排空間感不足無可避免；中排2+1座位設計，坐兩個人會享受，但拉起中間手把坐多一個嘅話，舒適度大大減弱。
操控舒服自在
外觀上，新版並無太大變動，不過車頭線條明顯經過修飾，立體感更勝一籌；一氣呵成組合成V形鬼面罩同頭冚，跟Mazda其他新版車種同出一轍，醒目有型。最明顯不同係霧燈加上金屬飾邊，整體而言，新版嘅車頭輪廓更為突出。
車尾最大嘅改變係尾燈，燈箱內一整條嘅LED燈相當奪目，而且亮起時間比傳統燈泡快一倍，如果後車以時速80公里行駛，煞車距離就可縮短3米，唔使講，駕駛安全性梗係又高咗！
雖然沿用舊有嘅一台2.0引擎，但經重新調校及配置S-VT系統後，起動表現同耗油量都稍有改善，再加上新版以5前速波箱取代之前嘅4前速，更緊密嘅齒比令加速時嘅反應更順暢。手握真皮軚環，眼睇有型搶眼嘅全新白光錶板，開住全新嘅Mazda5，應該係舒服自在，都幾嘆……
全新Mazda5（豪華版）規格
引擎：1,999c.c.
馬力：144hp/6,500rpm
扭力：18.4kgm/4,500rpm
傳動：5前速+/-自動波
查詢：萬事得汽車（28931112）
