噚日港股下跌1.4%，港交所（388）同地產股雙雙成為跌市重災區，前日入咗港交所嘅尖沙嘴溫小姐打嚟求教。港交所噚日收報146.9蚊，跌4.1%。
碩：黃敏碩 喬：張小喬 玲：楊慧玲
溫小姐：想問吓隻港交所，噚日154蚊入咗，𠵱家隻股跌穿埋政府入市價，點做好？
碩：其實都冇計喎，港交所一向都係Accumulator最多掛鈎嘅股份，你要考慮140蚊左右定番止蝕。
溫：𠵱家艇就坐咗，止蝕我都會定，但有冇嘢可以做balance（平衡）番個風險呢？我put番佢得唔得呢？
喬：其實散戶好難掌握買put輪，買put輪叻嘅人一係佢夠貼市，又或者熟期指走勢。388𠵱家個位比較尷尬，145蚊應該會有初步支持，如果𠵱家先開倉，值博率唔高，隨時得不償失。
溫：炒港交所都係博政府會再買，佢應該會再入市買㗎嘛？
碩：政府入市已經俾公眾質疑，相信佢哋唔會輕舉妄動。
溫：如果我唔認輸，長揸有無前途呢？
碩：𠵱家港交所預測市盈率都拉低番去27、28倍，如果有冲喜消息，要去番160至180蚊又唔係遙不可及。
--尖沙嘴溫小姐個案--
買入價：154元 目標價：－
止賺價：－ 時期：長期
紫金礦業（2899）
金價睇1000美金
David：見到金價每盎斯上到去940蚊美金，睇番之前好多人估會見1000蚊美金，所以推介紫金礦業（2899），我覺得佢有機會上番13蚊。隻股股價今個月喺9蚊打咗底，走勢靚番。好似呢兩日個市弱，但隻股仲升，波動市攻番啲商品股會穩陣啲。
碩：炒呢啲股唔一定跟足金價，因為股價會先行，但紫金嘅PE（市盈率）都唔低，我對佢有小小保留，相反江西銅業（358）呢幾日走勢唔錯，喺15、16蚊打底炒番上嚟，佢又有金礦，兩者我比較喜歡江銅。你定個目標價13蚊水平好似高咗啲，股價𠵱家企喺250天樓上，100天線11.3蚊應有阻力，日後升勢要睇番金價表現。
David：其實我都有留意一隻紫金call輪（6121），小注博唔博得過？
喬：紫金嘅場外期權唔易做對冲，好易冇價冇市，所以有流通量風險，所以紫金嘅call輪唔係咁值博，建議David都係買番正股安全啲。
--西環David建議--
買入價：10.3元 目標價：13元
止賺價：9元 時期：一個月
確思醫藥（8250）
高追新業務概念
TaMaMa：我今日推介確思醫藥（8250）。
玲：好少人揀呢啲股份，呢隻股今日復牌，升咗兩成幾（升22.6%，收報0.13蚊），點解揀呢隻股？
TaMaMa：揀呢隻股係因為見到佢用2億銀買咗啲醫藥業務（確思與西藏藥業成立一家開發第一類新藥業務，新開發藥物可有效治療心臟疾病。），有新業務概念。
玲：所以你睇好佢，長遠嘅投資。
TaMaMa：唔長遠，係短炒。
碩：呢隻股股價已經彈升咗，同埋佢今次同西藏藥業合作做啲基因工程產品，對間公司業績有乜貢獻，起碼等半年先知，另一樣係睇番間公司以前嘅業績都係麻麻，公司喺2月5日公佈業績係由盈轉虧，蝕41萬蚊，唔派息，都係小心啲好。仲有，公司注入新業務，係唔係可以即時賺錢呢？可唔可以改善現金流呢？
玲：公司公佈收購後，股價已被推升咗，股價再升要有新動力，股價升咁多，喺現價入似乎危機四伏！
--長沙灣TaMaMa建議--
建議買入價：0.13元 目標價：0.2元
止蝕價：0.1元 時期：一個月
招商銀行（3968）
拉勻三注有微利
關公：噚日喺26.7蚊入咗招行（3968）。今日喺25.5蚊溝咗一注，再喺25蚊再買大啲入多一注，第三注臨尾放咗，拉勻三注計𠵱家都算有微利。但頭嗰兩注𠵱家仲坐緊艇，碩哥點睇呢？
碩：我覺得凶險，今日有利好、利淡嘅消息，利好就係招行有望獲得首批銀行投資保險公司試點，利淡因素係招行下周三有25億A股禁售期屆滿，由非流通變成流通股份，令招行呢幾日股價大跌，跌番去1月22日個位（當日收市價26.65蚊）。
喬：中資銀行𠵱家只宜短炒，股價跌而成交額大即係沽壓重，所以宜先忍一忍手，等消化咗啲沽壓，我擔心啲沽壓唔會一兩日就完。
玲：招行A股噚日跌咗超過5%，下周仲有大量A股解禁，早前中石油A股解禁，股價一路跌，所以要小心。
關：呢個位仲會跌？
碩：我大膽啲講仲會跌，因為勢弱。
--大埔關公個案--
買入價：25.5/25元 目標價：28元
止蝕價：24元 時期：－
